मालपोत ज्याकुथिइ अनलाइन सेवा

येँ – भूमि व्यवस्था, सहकारी व गरिबी निवारण मन्त्रालयं स्वनिगःलिसें देय्या थीथी मालपोत ज्याकुथिइ अनलाइन प्रणालीया विस्तार याःगु दु । सरकारं जग्गाया कारोबारयात व्यवस्थित यायेगु ल्याखं स्वनिगःलिसें स्वीन्हय्गू मालपोत ज्याकुथिइ अनलाइन प्रणाली विस्तार याःगु खः ।

मालपोत ज्याकुथिइ विस्तार याःगु अनलाइन प्रणाली सेवां देय्न्यंकं जुइगु जग्गा कारोबार ७० प्रतिशत स्वयां अप्वः कःघाइगु जूगु दु । मन्त्रालयया सचिव गोपीनाथ मैनालीया धापूकथं अनलाइन प्रणालीइ सम्बन्धित मनूया पचिंया छाप व्यवस्थित यायेगु ज्यां जग्गा कीर्ते व जालसाजी जुइगु जोखिमं जग्गाधनी सुरक्षित जुइगु विश्वास प्वंकादिल ।

अनलाइन प्रणालीया विस्तार लिपा थुगु सेवा लागू याःगु ज्याकुथिइ विचौलियातय् उपस्थितियात न्यूनीकरण यायेत नं ग्वाहालि जू वनीगु विश्वास याःगु दु । मन्त्रालयं थौं स्वयां निदँ न्ह्यः हे शुरु याःगु थुगु प्रणालीं कारोबारयात व्यवस्थित यायेत व सम्बन्धी मालपोत ज्याकूया अभिलेखयात वैज्ञानिकीकरण यानातइगुलिं सर्वसाधारण लाभान्वित जुइगु आशा याःगु दु ।

थुगु प्रणालीया विस्तार लिपा जग्गा जमिन मालेत व हाकनं न्याये–मी यायेमाःसां याकनं ज्या सिधयेके फइगु जूगु दु । अनलाइनय् व्यवस्था यानातःगु जग्गा न्ह्याबलेंया निंतिं सुरक्षित जुइगुलिं तमसुकया लिधंसाय् सम्बन्धित व्यक्तिया विवरण प्रणालीइ दर्ता यायेगु याइसा व उकियात लिपा ज्याकुथिं प्रमाणीकरण याइ ।