ने. सं. ११४४ कछलागा तृतीया -

सुमन सायमि लगायतयात मत्वःतूगुलिं कालिमातिइ पसः बन्द यानाः विरोध

येँ – प्रहरी चौकीइ नेवाः भासं खँ ल्हात धकाः जूगु विवादया झ्वलय् ज्वनातःपिं उपत्यका सतक विस्तार पीडित संघर्ष समितिया अध्यक्ष सुमन साय्मि लिसें मेपिं ज्वनातःगु विरोधय् माग यासें थौं आइतवाः कालिमातिइ स्वतःस्फूर्त पसः बन्द याःगु दु । कालिमाति चित्तधरया सालिक निसें सोल्टीमोडतकया फुक्क पसः बन्द यानाः साय्मिलगायतयात तुरुन्त त्वःतेत माग याःगु खः ।

आइतवाः स्वतःस्फूर्त रुपं पसः बन्द जूगु स्वयेत चाःहिलाच्वंपिं स्थानीयतय्त तकं प्रहरीं छझाः पनेगु ज्या याःगु खःसा प्रहरीतय्सं बन्द यानातःगु पसः चायेकेत नं दबाब बीगु लिसें प्रहरीं थःम्हं हे चायेकेगु ज्या नं याःगु खः ।

बालाजुइ सतक विस्तारया निंतिं छेँ थुनातःथाय् जूगु विवादया झ्वलय् ज्वनायंकूपिं त्वःतकेगु निंतिं बालाजु प्रहरी चौकीइ वंम्ह साय्मियात चौकी दुने नेवाः भासं खँ ल्हात धकाः जूगु विवादया झ्वलय् ज्वंगु खः । अभद्र व्यवहार याःगु मुद्दा फयाच्वंपिं वय्कःपिंत फौजदारी मुद्दाय् ज्वनीपिं अपराधीतय्त थें हतकडी न्ह्याकाः बालाजु चौकीं सोह्रखुट्टे चौकीइ स्थान्तरण यायेधुंकूगु दु ।

सतकविस्तार पीडितपिंत ज्वंगु विरोधय् शनिवाः सनिलय् नं कालिमाटीइ प्रदर्शन जूगु खः । साय्मि कालिमातिया स्थानीय वासिन्दा खः ।

अथेहे वंगु शुक्रवाः माइतघर मण्डलाय् नं प्रदर्शन जूगु खः । शुक्रवाः जूगु प्रदर्शनय् नागरिक आन्दोलनं नं समर्थन याःगु खःसा सतकविस्तार पीडितपिंत न्याये बीमाःगु माग याःगु खः ।

अध्यक्ष सायमि लिसें पीडितपिं महेश्वर मानन्धर, मीन शाही, भिमदेव श्रेष्ठ,रुक्षित श्रेष्ठ, दिपेन श्रेष्ठ, विरोचन श्रेष्ठ, संजय तामाङयात वंगु बुधवाः निसें ज्वनाः कुनातःगु दनि ।

अभियन्ता विद्या श्रेष्ठया लाइभ भिडियाे