अस्ट्रेलियाय् झिला लिपा कोरोनां छम्ह सित, अस्पतालय् भर्ना जुपिं नं अप्वल
एजेन्सी अस्ट्रेलियाया सिड्नीइ शनिवाः कोरोना भाइरसया कारणं छम्ह मनू सीगु दु । अस्ट्रेलियाय् कोरोनाया कारणं मनू सीगु थ्व झिला लिपाया न्हापांगु घटना खm । स्थानीय अधिकारीतय्सं बिउगु जानकारीकथं मदुम्ह मनु ९० दँ पुले धुंकूम्ह मिसा खः ।
सिड्नीइ थौंकन्हय् न्हियान्हिथं कोरोना संक्रमण अप्वया वनाच्वंगु दु । थीथी सञ्चार माध्यमं धाःकथं न्यू साउथ वेल्सय् ५० म्ह सिबें अप्वः मनूतय्त कोरोना संक्रमणं यानाः अस्पतालय् भर्ना यायेमाःगु दुसा १५ म्हेसित आइसीयुलय् तयाः वासः याकातःगु दु । शनिवाः सिड्नीइ ७७ म्ह न्हूपिं कोरोना संक्रमित खनेदुगु खःसा स्वास्थ्य अधिकारीतय्सं धाःकथं संक्रमण अझ थहां वनेफुनि ।
सिड्नी आः छवाःया निंतिं लकडाउन तयातःगु दुसा संक्रमण थहां वनाच्वन धाःसा लकडाउन थप जुइगु निश्चित खनेदु । अस्टे«लियाया नीति निर्माणय् मू भूमिका दुपिं विश्वविद्यालयया प्रोफेसरतय्सं वाःवाःपतिकं लकडाउनया घोषणा यानाच्वनेगु सिबें ताःहाकःगु लकडाउन यायेगु बिचाः प्वंकूगु दु । अथे हे थ्व चिकुलायात विन्टर लकडाउनया घोषणा यायेत नं सरकारयात सुझाव बिउगु दु । मजिमगाःगु बाहेक मेमेगु बजाः बन्द यायेत व न्यागू किलोमिटरं अप्वः तापाक पिहां मवनेगु नियम दयेकेत नं प्रोफेसरतय्सं धाःगु दु ।
सिड्नी लकडाउनया पालना मयाःपिंत प्रहरी जरिवाना नं यानाच्वंगु दु । सरकारं छेँय् हे च्वनेत आदेश जारी यायेधुंकूगु दुसा म्वाःसां म्वाःसां पिहां मवयेत व छेँय् पाहाँ मसःतेत नं इनाप याःगु दु । लकडाउनं यानाः ज्या मदुपिंत सरकारं ग्वाहालि यायेगुु बचं बिउगु दु । अथे हे मास्क तयेत नं सरकारं इनाप याःगु दु । लकडाउनं जुयाच्वंगु थाय् नेपाःमितय्गु यक्व च्वनीगु थाय् खः ।
LEAVE YOUR COMMENTS