स्वक्वःगु उदाय् मुना क्वचाल

नेपालभाषा टाइम्स

यल – स्वक्वःगु उदाय् मुनाया सांस्कृतिक, सांगीतिक व फेशन शोया वंगु शनिवाः च्यारिटी शोकथं जाउलाख्यलय् च्वंगु डिएभि कलेजय् झःझः धायेक जुल । थःगु जातीय म्हसीका व उदाय् प्रतिभा न्ह्यब्वयेकथं उगु ज्याझ्वः जूगु खः । शोलय् उदाय् समुदायया कलाकारपिंसं न्ह्यइपुक थीथी सांगीतिक व सांस्कृतिक प्रस्तुति बिउगु खः ।

मंगलधुन थानाः सुरु जूगु ज्याझ्वलय् असंया परम्परागत कुम्वःद्यः पिथनेगु ज्या नं जूगु खःसा पञ्चबुद्ध, पंचकुमारी मस्तय् हुलाप्याखंलिसें थीथी न्ह्यइपुसे च्वंगु नेवाः म्येँ, बुदिंया भिंतुना म्येँ नं न्ह्यब्वःगु खः । अथे हे ज्याझ्वलय् फेशन शो नं क्यनेगु ज्या जूगु खः ।
उदाय् समाजया नायः डा. रुपज्योति कसाः, समाजया निवर्तमान नायः पंचवीरसिंह तुलाधर लगायत विशिष्ट व्यक्तित्वपिनिगु उपस्थितिइ थुगु ज्याझ्वः जूगु खः ।

नापं थुुगु ज्याझ्वः ताःलाकेत आर्थिक ग्वाहालि बियादीपिं नापं ज्याझ्वः ताःलाकेत थीथीकथं ग्वाहालि यानादीपिंत मनिताया चिं नं वय्कलं लःल्हानादीगु खः । ज्याझ्वःया अन्तय् उदाय् समाजया मूछ्याञ्जे स्वयम्भूरत्न तुलाधरं सुभाय् देछानादीगु खः ।