छत्रपाटी चिकित्सालयया नवनिर्वाचित पदाधिकारीपाखें शपथग्रहण
येँ – छत्रपाटी निःशुल्क चिकित्सालय अस्पतालया न्हूगु कार्यसमिति निर्वाचित पदाधिकारीपिंसं शपथ ग्रहण याःगु दु । मंगलवाः जूगु छगू ज्याझ्वःया दथुइ प्रमुख निर्वाचन अधिकृत विश्वनाथ भट्टराईं निर्वाचित पदाधिकारीपिंत शपथ ग्रहण याकादीगु खः । वय्कःपिंसं श्रावण १ गते बुधवाःनिसें पदभार लःल्हाना कयादीगु खः ।
शपथ ग्रहण ज्याझ्वलय् न्ववानादिसें नवनिर्वाचित अध्यक्ष डा. मनोज श्रेष्ठं चिकित्सा ख्यलय् छगू इतिहास क्वबिया वयाच्वंगु छत्रपाटी निःशुल्क चिकित्सालयया नेतृत्वय् वयेधुंकाः थःत अझ जिम्मेवारी बोध जूगु खँ धयादिल । निर्वाचनया झ्वलय् थःम्हं प्वंकागु प्रतिबद्धता पूवंकेगु खँ धासें वय्कलं धयादिल, ‘जिमिसं चुनावया झ्वलय् प्वंकागु प्रतिबद्धता पत्र वांछ्वयादीमते, लिपा थ्व हे प्रतिबद्धता पत्र ज्वनाः जिमिके प्रतिबद्धता कथं छु छु ज्या जुल धकाः न्यनादिसँ ।’
थ्व झ्वलय् वय्कलं चिकित्सालयया न्हूगु भवनय् रेट्रो फिटिङ्ग यायेमाःगु खःसां रेट्रो फिटिङ्ग यायेबलय् चिकित्सालयया सेवात दिकेमालीगु जूगुलिं छु यायेगु धयागु दोधारय् लानाच्वंगु खँ नं धयादिल । अथेहे चिकित्सालयय् ‘निःशुल्क’ धयागु खँग्वः दुथ्याःगुलिं सरकारं खुदँ न्ह्यवनिसें नवीकरण तकं यानामबिउनिगु खँ धयादिसें थःपिंसं नवीकरणया निंतिं थप कुतः यायेगु खँ धयादिल ।
लिसें वय्कलं चिकित्सालयपाखें येँ महानगरपालिकाया १७ वडाय् च्वंपिं ७५ दँ थ्यनेधुंकूपिं ज्याथजिथिपिंत चुकचुकय् हे वनाः स्वास्थ्य सेवा बीगु खँ नं धयादिल । निर्वतमान अध्यक्ष विजय मालीं नवनिर्वाचित पदाधिकारीपिंत भिंतुना देछासें भूकम्प प्रतिरोधक भवन दयेकेगु निंतिं थःपिंसं ७० प्रतिशत बजेट चूलाकेधुनागु खँ धयादिल ।
ज्याझ्वलय् वय्कलं नवनिर्वाचत पदाधिकारीपिंत ह्याउँसिन्हः तिकाः भिंतुना यासें नवनिर्वाचित अध्यक्ष श्रेष्ठयात चिकित्सालयया चिं गं व मुगः लःल्हानादीगु खः । अथेहे निवर्तमान सचिव नवीन मानन्धरं नवनिर्वाचित महासचिव राजेन्द्र प्रसाद मानन्धरयात म्यान्युट व निवर्तमान कोषाध्यक्ष दिनकरमान सिं प्रधानं नवनिर्वाचन कोषाध्यक्ष सजन जोशीयात आर्थिक नियमावली लःल्हानादीगु खः ।
प्रमुख प्रशासकीय अधिकृत लिना शाक्यं नवनिर्वाचित पदाधिकारीपिंत ख्येँ सगं बियादिल । चिकित्सालयया निवर्तमान सचिव व येँ मनपा १७ वडाया अध्यक्ष नवीन मानन्धरं थःगु वडापाखें चिकित्सालययात न्ह्याबलें ग्वाहालि दइगु बचं बियादिसें नवनिर्वाचित पदाधिकारीपिंत भिंतुना देछायादिल ।
वय्कलं निवर्तमान अध्यक्ष मालीया ३७ दँया कार्यकालय् चिकित्सालय् स्वर्ण युगय् थ्यंगु धासें १७ वडाय् च्वंगु चिकित्सालय जूसां थुकिया पहिचान देया ७७ गुलिं जिल्लाय् दुगु खँ धयादिल ।
LEAVE YOUR COMMENTS