ने. सं. ११४४ कौलाथ्व पारू - नःलास्वनेगु

२ प्रतिशत ब्याज बारे अर्थमन्त्री–गभर्नर सहलह

येँ – तःभुखाचं पीडित जनताया निंतिं सरकारं बीगु धाःगु २ प्रतिशत ब्याजया त्यासायात कयाः अर्थमन्त्री डा. युवराज खतिवडा व राष्ट्र बैंकया गभर्नर चिरञ्जीवी नेपाल दथुइ सहलह जूगु खँ सीदुगु दु ।

भुखाचं पीडित जनताया थ्व समस्यायात कयाः एमाले नेता केशव बडालं अर्थमन्त्री व पीडित जनता दथुइ खँल्हाबल्हाया ज्या याकादीगु खः । उगु इलय् नं अर्थमन्त्री खतिवडां गभर्नर नापलानाः थ्व समस्या ज्यंकेगु बचं बियादीगु खः ।

वय्कःया वहे बचं कथं अर्थमन्त्री खतिवडां गर्भनर नेपालयात सःताः अनौपचारिक रुपं खँल्हाबल्हा यानादीगु खः । खँल्हाबल्हाय् गर्भनर नेपालं थ्व समस्या ज्यंकेत थम्हं कुतः यायेगु बचं बियादीगु खँ सूत्रं धाःगु दु ।

वय्कःपिनि दथुइ भुखाचं पीडित जनताया थ्व समस्या समाधान मजूतले मेपिं पीडितयात त्यासा मबीगु सहमति जूगु खँ नं सीदुगु दु । उकिया निंतिं वाणिज्य बैंकतय्त निर्देशन बीगु खँ नं जूगु दु ।

तःभुखाय् लिपा राहत स्वरुप सरकारं सहरी लागय् २५ लाख तका व ग्रामिण लागाय् १५ लाख तका तक २ प्रतिशत ब्याजदरं न्यादँनिसें झिदँ तकया निंतिं त्यासा बीगु निर्णय याःगु खः । तर आः वयाः पुनर्कर्जा ऐन संशोधन यानाः थ्व त्यासा निदँया लागिं जक बीगु जुल धायेवं पीडित जनतां राष्ट्र बैंकया ध्यानाकर्षण याकूगु खः । उगु निर्णय लिपा निदँ लिपा भुखाचं पीडित जनतां त्यासा पुले मफइगु धासें विरोध याना वयाच्वंगु खः ।

राष्ट्र बैंकया मौखिक निर्णय लिपा आपालं भुखाचं पीडित जनतां न्हापा थःपिंसं झिदँया निंतिं कयागु त्यासा निदँया दुने पुले फइ मखु धासें सरकारं थःपिंत झंगः लाःगु द्वपं बियाच्वंगु दु । थ्व त्यासा पुले माल धाःसा छेँबुँ हे लिलामय् लाये फुगु खँ धाःगु दु ।