खाद्यान्न अभाव मजुइमा धकाः आपूर्तिया निंतिं समन्वय यानाच्वनागु दु

ईश्वरमान डंगोल, प्रवक्ता, येँ महानगरपालिका

येँ महानगरपालिकां कोराना भाइरस नियन्त्रण, राहत, खाद्यान्न आपूर्ति सम्बन्धी गुकथं ज्या यानाच्वंगु दु धयागु बारे येँ महानगरपालिकाया प्रवक्ता व येँ मनपा १५ वडाया अध्यक्ष भाजु ईश्वरमान डंगोल लिसे तेजनारायण महर्जनं यानादीगु बःचाहाकःगु खँल्हाबल्हा –

कोरोना संक्रमण जुइके मबीगु निंतिं येँ महानगरपालिका व जनप्रतिनिधिपिंसं गुकथं ज्या यानाच्वंगु दु ?
– येँ महानगरपालिका नगरय् कोरोना भाइरस दुहां मवयेमा धयागु खँय् तसकं सचेत दु । थुकियात नियन्त्रणया निंतिं जनप्रतिनिधिपिं थःपिं हे खटे जुयाः ज्या यानाच्वंगु दु । दकलय् न्हापां नियन्त्रणया निंतिं नगर न्यंकं किटनाशक वासः छ्वाकेगु ज्या जुयाच्वंगु दु । न्हि ७० निसें ८० हजार लिटर वासः छ्वाकेगु ज्या जुयाच्वंगु दु । अथेहे विदेशं वःपिं संक्रमितत दयेफुगुयात ध्यानय् तयाः विदेशं लिहां वयाच्वंपिं मनूतय्गु रेकर्ड कायेगु ज्या जुयाच्वंगु दु । येँ महानगरपालिकापाखें ५० बेडया क्वारेन्टाइन दयेकेगु योजना नं दयेकाच्वनागु दु । अथेहे येँ महानगरपालिकापाखें थः कोरोना संक्रमित खः कि मखु धयागु थःम्हं हे स्वये फइगु छगू एप नं तयार याःगु दु ।

विदेशं लिहां वःपिं गुलि दु ? उमित येँ मनपां छु याइ ?
– आः विदेशं वःपिनि रेकर्ड कायेगु ज्या जुयाच्वंगुलिं आःतक गुलि ल्याखय् दु धयागु रेकर्ड पिहां वःगु मदुनि । थ्व छवाः दुने थ्व रेकर्ड नं पिहां वइ जुइ । विदेशं वःपिनि रकेर्ड कायेगु झ्वलय् उमिगु अवस्था बारे नं जाँच यायेगु ज्या जुयाच्वंगु दु । यदि सुयाकें छुं समस्या खनेदत धाःसा येँ महानगरपाखें उद्धारया ज्या नं याइ । यदि स्वास्थ्य समस्या खनेमदु, सामान्य हे अवस्थाय् दुसा छेँ नं पिहां मवसवे, थः छेँजःपिं पाखें नं तापाक छुं मखुसां झिंप्यन्हुया निंतिं क्वारेन्टाइनय् च्वनेत धया च्वनागु दु ।

महानगरं तयार याःगु ऐप छु खः ?
येँ महागरपालिकां तयार याःगु थ्व ऐपय् छिगु स्वास्थ्यया अवस्था गज्याःगु दु धकाः बुँदा बुँदाय् तयातःगु दु । उकी क्लिक यानाः सब्मिट यात कि ऐपं हे संक्रमित खः कि मखु धयागु जानकारी बी । यदि थुकी नं चित्त बुझे मजुल धाःसा थःगु फोन नं. तयाः सब्मिट यानादिल कि थ्व येँ महानगरपालिकाया हेल्थ डेस्कय् वनी । अले अनया चिकित्सकपिंत छितः माःगु सुझाव बी । छन्हु निन्हु हे थ्व ऐप सार्वजनिक जुइ ।

राहत वितरण पाखे छु जुयाच्वंगु दु ?
येँ महानगरपालिकाया सोमवाः जूगु कार्यपालिकाया बैठकं राहत वितरण सम्बन्धी छगू मापदण्ड तयार याःगु दु । थ्व हे मापदण्ड कथं राहत बीगु ज्या न्ह्याइ । थ्व मापदण्ड कथं न्हियान्हिथं ज्या यानाः नयेमाःपिं, ज्या मन्त नयेमखंपिंत संगठीत संस्थाय् ज्या यानामच्वंपिं, येँ दुने थःगु छेँ बुँ मदुपिं, नये मखंपिं, अनाथालय, आश्रम, देगः मस्जिद आदि थासय् आश्रय कयाच्वंपिंत राहत बीगु खँ दु । थुकिया निंतिं आः अज्याःपिं मनूतय् नां संकलन यायेगु ज्या जुयाच्वंगु दु । नां दुथ्याकेगु निंतिं स्थानीय टोल सुधार समिति वा घरपतिपाखें सिफारिस याकाः कायेगु जुइ ।

मापदण्ड कथं याकः मनू जुल धाःसा जाकि ४ किलो, दाल १ किलो, चिकं बागू लिटर, चि छगू पाकेट, आलु प्याज १ किलो व बजि आधा किलो बी । अथेहे निम्ह निसें प्यम्हेसिया परिवार जुल धाःसा जाकि १२ किलो, दाल २ किलो, चिकं आधा लिटर, चि १ किलो, आलु प्याज ३ किलो, बजि २ किलो बी । अथेहे न्याम्ह व व स्वयां अप्वः परिवार दुपिंत जाकि १६ किलो, दाल ३ किलो, चिकं १ लिटर, चि १ किलो, आलु प्याज ४ किलो, बजि ३ किलो बी ।

अथेहे गृह मन्त्रालयं नं छुं संघसंस्थां राहत बीमाल धाःसां नं स्थानीय निकायया वडा समितिमार्फत बीमाःगु निर्देशन बिउगु दु । थुकिया निंतिं वडाअध्यक्षया नेतृत्व छगू समिति नीस्वनाः ज्या न्ह्याकीगु जुइ । संघसंस्था पाखें वःगु राहत नं थ्व हे समितिमार्फत एकद्वार प्रणाली कथं इनेगु जुइ । थथे जुल धाःसा छम्हेसित हे निक्वः स्वक्वः राहत लाइगु जुइमखु ।

तर राहत वितरणया खँय् नगरवासीपिंसं छगू खँ छु थुइकेमाःगु दु धाःसा थ्व भुखाय् ब्वःबलय् थें दक्वसितं बीगु राहत मखु । थ्व गरिब, निमुखा, नयेमखंपिंत जक बीगु राहत खः । तर गुलिखे वडाय् राहत बीगु धायेवं नयेत्वने दुपिं नं थःपिंत नं राहत माल धकाः धाः वयेगु यानाच्वंगु दु । अथे यानामदीत सकसितं जिमिगु इनाप दु ।

राहत म्वाःपिंत खाद्यान्न गुकथं व्यवस्था यायेगु ले ?
लकडाउनया इलय् नं सरकारं खाद्यान्न, तरकारि, ग्यास, वासः, लः पसः चायेके बियाच्वंगु दु । थःत सतिक लाःगु पसलय् वनाः खाद्यान्न न्यायेफइ । जिमिसं आः थज्याःगु खाद्यान्न पसलय् खाद्यान्न अभाव मजुइमा धयागु खँ ध्यान बियाच्वनागु दु । थुकिया निंतिं जिमिसं उद्योग वाणिज्य महासंघलिसे समन्वय यानाः पसः पसलय् खाद्यान्न आपूर्ति मपनेमा धयागु निंतिं समन्वयात्मक भूमिका म्हिताच्वनागु दु ।

येँ मनपां क्वारेन्टाइन दयेकेगु धाःगु छु जुयाच्वंगु दु ले ?
थुकिया निंतिं ज्या न्ह्यानाच्वंगु दु । आः थाय् मालेगु ज्या जुयाच्वंगु दु । थ्व नं याकनं हे दयेकेगु जुइ ।

अन्तय् छुं धायेगु ।
कोरानोया दकलय् बांलाःगु वासः धयागु हे पिहां मवसे छेँ च्वनेगु खः । थौंकन्हय् यक्व मनूत खाद्यान्न न्यायेगु, वासः न्यायेगु नामय् पिहां वयेगु यानाच्वंगु दु । उकिं जिमिगु विनम्र आग्रह दु कि छेँय् हे च्वनादिसँ । छुं न्हि छेँय् च्वनाः छुं स्यनीमखु । यदि पिहां वयाः कोरोना न्यनावन धाःसा झीसं पने फइगु स्थिति मदु ।

सम्बन्धित बुखँ

LEAVE YOUR COMMENTS