श्रीदेवी हृदयघात जुयाः सीगु मखु – पोस्टमार्टम रिपोर्ट

भारतीय अभिनेत्री श्रीदेवी सीगु कारण हृदयघाट मखु खँ पिहां वःगु दु । दुबइलय् वयागु सीम्हया पोस्टमार्टम जूबलय् डुबे जुयाः सीगु रिपोर्ट बिउगु दु । दुबई नं पिहां वःगु गल्फ न्यूज पत्रिकाया कथं श्रीदेवीया शरीरं अय्लाःया अंश नं लूगु दु । उकिं अप्वः अय्लाः त्वनाः दयाः बाथटबय् डुबे जुयाः सीगु खँ पत्रिकां च्वःगु दु । वयागु सीम्ह नं बाथटबय् हे लूगु खँ धाःगु दु ।

दुबईया प्रहरीं श्रीदेवी सीगु कारणया रिपोर्ट वया छेँजःपिंत व भारतीय महावाणिज्य दूतावासयात बुझे यायेधुंकूगु खँ धाःगु दु । पोस्टमार्टम रिपोर्टय् श्रीदेवी सीगु कारण हृदयघाट मखु धयागु वःगुलिं वयागु सीम्ह भारत छ्वया हयेगु निंतिं नं ई कयाच्वंगु खँ धाःगु दु । पोस्टमार्टमया अन्तिम रिपोर्ट पिहां मवःनिगुलिं सीम्ह हयेत अझं लिबायेफुगु खँ धाःगु दु ।

दुबई प्रहरीं आः थुकिया छानविन यानाच्वंगु खँ धाःगु दु । छानविनया झ्वलय् भ्वजय् सहभागी जूपिंत तकं दुबई नं लित छ्वयामहःगु खँ पिहां वःगु दु ।
श्रीदेवी थः भाःत बोनी कपुरया भिन्चिया इहिपा भ्वजय् सहभागी जुइत दुबई वंगु खः । अनया म्हीग बहनी आकाझाकां श्रीदेवी सीगु खः ।