लुँया सिखः लुटे याःम्ह ज्वन

येँ- लुँया सिखः लुटे यानाः बिसिउँ वंम्ह छम्हेसित प्रहरीं ज्वंगु दु । थनया येँ महानगरपालिका वडा नं. २६ मित्रनगरय् लँय् वनाच्वंम्ह छम्ह मिसाया सिखः लुटे याना बिसिउँ वंम्हेसित प्रहरीं ज्वंगु दु ।
धादिंग छेँ जुयाः थौंकन्हय् तारकेश्वरय् च्वना वयाच्वंम्ह रवि परियारयात बसपार्क लिक्कसं च्वंगु विष्णुमति खुसि सिथय् न्यासि वनाच्वंगु इलय् सोमवाः प्रहरीं ज्वंगु खः । परियारं येँ मनपा २६ मित्रनगरय् लँय् वनाच्वंम्ह छम्ह मिसां क्वखानातःगु लुँया सिखः लुटे यानाः बिसिउँ वंगु खः ।

म्हय्पिइ च्वना वयाच्वंम्ह अन्दाजी ५० दँ दुम्ह मिसां थःगु गःपतय् क्वाखाना तःगु २ तोलाया लुँया सिखः लुटे यानाः बिसिउँ वंगु धइगु सुचं वयेवं महानगरीय प्रहरी प्रभाव ग्वंगःबुँपाखें खटे जुया वंगु प्रहरीया पुचलं परियारतयात विष्णुमती खुसि सिथय् वनाच्वंगु इलय् सिखः नापं ज्वंगु खः ।
थ्व हे झ्वलय् येँ मनपा वडा नं. २६ म्हय्पि ताँया लिक्कसं बालं च्वना वयाच्वंम्ह दिलकुमार राईयात लुटपाट याःगु दु । राईयात लुटपाट यानाः वयाके च्वंगु छगूत्या लख दांलिसें मोबाइल छगः खुया यंकूगु दु ।

लँय् वनाच्वंगु इलय् झिम्ह झिंनिम्हेसिया पुचलय् वःपिं म्हमसिउपिनिगु पुचलं दाये फक्व दायाः वयाके च्वंगु ध्यबा व मोबाइल लुटे याना यंकूगु खः । घाःपाः जूम्ह राईया शिक्षण अस्पतालय् वासः जुयाच्वंगु दुसा घटनाय् संलग्न जूगु द्वपनय् न्याम्हेसित प्रहरीं नियन्त्रणय् कयाः अनुसन्धान यानाच्वंगु दु ।