कान्तिपुरया पत्रकार सिनाच्वंगु लुल

येँ (नेपालभाषा टाइम्स) – वंगु सोमवाःनिसें तनाच्वंम्ह कान्तिपुर न्हिपौया उपसम्पादन बलराम बानियाँया सीम्ह लूगु दु। मकवानपुरया सिस्नेरीइ च्वंगु माण्डो जलविद्युत आयोजनाय् बानियाँया सीम्ह लूगु खँ प्रहरीं धाःगु दु। पत्रकार बानियाँ निन्हु न्ह्यवंनिसें छेँय् मवःगु धासें छेँजःपिसं महानगरीय प्रहरी परिसर येँ व अपराध अनुसन्धान महाशाखा न्हू बानेश्वरय् म्हिगः उजुरी बिउगु खः ।

अपराध महाशाखां बानियाँया मोबाइल व फोनया प्राविधिक विश्लेषणया आधारय् मालेगु ज्या याःगु खःसा बानियाँया मोबाइल सोमवाः बल्खु खुसि सिथय् स्वीच अफ जुयाच्वंगु अवस्थाय् लुइकूगु खः । प्रहरीया कथं सोमवाः न्हिनय् ३ः२३ बजे बानियाँ बल्खु पुसिया ताँ क्वय् वनाच्वंगु खःसा स्थानीय जनतां वय्कःयात अन वने मते धकाः पनेगु ज्या समेत याःगु खः ।

खुसिइ क्वबाःगु आशंकाय् नेपाली सेना, नेपाल प्रहरी व सशस्त्र प्रहरीं बानियाँयात मालेगु ज्या न्ह्याकूगु खःसा खुसि सिथय् लूगु लाकां बानियाँयागु हे जूगु वय्कःया म्ह्याचं पुष्टि याःगु खः । बानियाँया कलाः लिसें छम्ह काय व छम्ह म्ह्याय् दी । बानियाँया मृत्यु रहस्यमय जूगुलिं थुकिया बारे छानबिन यायेत पत्रकार महासंघं माग याःगु दु ।