ने. सं. ११४४ ञलाथ्व दशमी -

तरकारी बजाः व्यवस्थापन यायेगु तयारी

येँ – कोरोना भाइरसया संक्रमणया इलय् तरकारी बजाःयात व्यवस्थापन यायेगु बारे गृहकार्य जुयाच्वंगु खँ येँ महानगरपालिकाया मेयर विद्यासुन्दर शाक्यं कनादीगु दु । म्हिगः ‘नेपालभाषा टाइम्स’ लिसे खँ ल्हायेगु झ्वलय् वय्कलं उगु जानकारी बियादीगु खः ।

तरकारी न्यायेगु निंतिं स्थानीय जनता छक्वलं पिहां वइगु कारणं यानाः संक्रमण अप्वयेफु धासें जनतायात सचेत जुइत नं वय्कलं इनाप यानादीगु दु । वय्कलं धयादिल, ‘कालिमाटी तरकारी बजाः चायेवं न्याद्वः स्वयां अप्वः छक्वलं मुनेगु यानाच्वंगु दु, गुकिं यानाः संक्रमणया जोखिम अप्वया वनाच्वंगु दु ।’ वय्कलं थुकथं छक्वलं अप्वः मुनिगु इलय् छम्ह जक संक्रमण जूम्ह व्यक्ति दत धाःसा आपालं मनूत संक्रमण जुइफइगु धासें सचेत जुइत इनाप यानादीगु दु ।

वय्कःया कथं थौंया संक्रमणया इलय् फयांफछि म्हो नसा ज्वलं उपभोग यायेमाःगु खःसां नं अप्वः हे नसा ज्वलं उपभोग यायेगु क्रम अप्वया वनाच्वंगु धासें मनूत म्वायेत नयेगु मखु, नयेत म्वानाच्वंगु थेंज्याःगु व्यवहार जुयाच्वंगु दु, गुकिं यानाः बजारय् न्हापा स्वयां अप्वः नसा ज्वलंया निंतिं माःगु सामान खपट जुयाच्वंगु दु ।

आःया इलय् जनता स्वय्म हे सचेत जुइमाःगु खँ कनादिसें धयादी, ‘थ्व इलय् सरकारं जक मखु जनता नं सचेत जुइमाःगु अवस्था खः, छुं गथे जुयाः संक्रमण न्यना वन धाःसा सरकारयात जक दोष बीगु पाय्छि मजू धासें गबलय् तक जनता सचेत जुयाः थःगु बानी बेहोरा सुधार याइमखु उगु इलय् तक सरकारं जक यानाः नं छुं जुइमखु ।’

आःया इलय् सञ्चार क्षेत्रं नं माःगु भूमिका म्हितेमाःगु खँ कनादीगु दु । थ्व इलय् जनतायात सुसूचित यायेगु दायित्व सञ्चार माध्यमया खः, थुखेपाखें बिचाः यायेमाःगु आवश्यकता जुयाच्वंगु दु ।

(ने. सं. ११४० चौलाथ्व ५ / वि. सं २०७६ चैत १६, आइतवाः)