गुम्बा, विहार, स्तुप पुनःनिर्माण कार्यविधि पारित

येँ – राष्ट्रिय पुनःनिर्माण प्राधिकरणं भुखाचं क्षतिग्रस्त गुम्बा, विहार, स्तुप संरक्षण, जिर्णोद्वार, मर्मन व पुनःनिर्माण सम्बन्धी कार्यविधि–२०७५ स्वीकृत याःगु दु । प्राधिकरणया वंगु छुं दिं न्ह्यः च्वंगु मुँज्यां थ्व सम्बन्धी कार्यविधि पारित याःगु खः ।

प्राधिकरणं पारित याःगु कार्यविधिकथं पुरातत्वया महत्व दुगु सछिदँ स्वयां पुलांगु व २००० वर्गफिट स्वयां च्वय्या प्लिन्थ एरिया दुगु क्षतिग्रस्त गुम्बा, विहार व स्तुपया पुनःनिर्माण आवश्यकताकथं पुरातत्व विभागया स्वीकृति कयाः केन्द्रीय आयोजना इकाइया प्रत्यक्ष संलग्नताय् याये दइगु व्यवस्था याःगु दु ।

अथे हे भुखाचं प्रभावित २००० वर्गफिट प्लिन्थ एरिया स्वयां म्हो दुगु गुम्बा, विहार व स्तुपाया पुनःनिर्माण यायेबलय् सम्बन्धित उपभोक्ता समितिमार्फत यायेगु ज्यायात प्राथमिकता बीगु नापं १०० दँ मथ्यंनिगु व २००० फिट स्वयां नं म्हो प्लिन्थ एरिया दुगु अज्याःगु सम्पदा व स्मारकया संरक्षण, जिर्णोद्वार व पुनःनिर्माण स्थानीय तहपाखें यायेगु कार्यविधिइ न्ह्यथनातःगु दु ।

२०७२ साल बैशाख १२ गतेया गोरखा केन्द्रविन्दु जुयाः ब्वःगु तःभुखाय् व वयां लिपाया पराकम्पया कारणं देय्न्यंकं १,३२० गुम्बा, विहार, स्तुपा क्षतिग्रस्त जूगु खः । उकीमध्ये पुनःनिर्माण यायेमाःगु गुम्बा, विहार, स्तुपाया ल्याः ८९५ व मर्मत सम्भार यायेमाःगु ४०२ दुगु प्राधिकरणं न्ह्यथंगु दु ।

 

सम्बन्धित बुखँ

LEAVE YOUR COMMENTS