हनुमानध्वाखा–स्वयम्भू सम्पदा मार्गया स्थलगत अध्ययन

येँ– विश्व सम्पदा धलखय् लाःगु हनुमानध्वाखा लाय्कू व स्वयम्भूयात सम्पदा मार्गया रुपय् विकास यायेगु निंतिं स्थगत अध्ययन याःगु दु । येँ ८ नं. क्षेत्रया जनप्रतिनिधि जीवनराम श्रेष्ठया नेतृत्व थ्व अध्ययन जूगु खः ।

स्थलगत अध्ययनय् ८ नं क्षेत्र प्रदेश खया सांसद राजेश शाक्यया लिसें स्थानीय तहया प्रतिनिधिपिं, युनेस्कोया नेपाल प्रतिनिधि क्रिस्टाइन म्यानहार्टपिं दुथ्याःगु खः । अध्ययन भ्रमणया इलय् स्थानीयवासी, सम्पदाविद् लगायतयापिंसं हनुमानध्वाखा लाय्कू लागा व स्वयम्भुइ लाःगु देगः, गाःहितिलिसें थीथी सम्पदा बारे जानकारी कयावंगु खः ।

हनुमानध्वाखा निसें स्वयम्भु तक स्वंगू किलोमिटर न्यासि वनाः स्थलगत अध्ययन लिपा प्रतिनिधि सभा सांसद श्रेष्ठं थ्व लागायात सम्पदा मार्ग दयेकेगु निंतिं माःगु नीति दयेकाः तयारी यायेगु खँ धयादीगु खः । सांसद श्रेष्ठं निवाः न्ह्यव युनेस्कोया प्रतिनिधि म्यानहार्टयात उगु क्षेत्रयात सम्पदा मार्ग दयेकेगु निंतिं ग्वाहालि यायेत प्रस्ताव तःगु खः ।

सम्बन्धित बुखँ

LEAVE YOUR COMMENTS