छेँय् मस्त छु यानाच्वन ? अनलाइनय् नेवाःभासं मस्तय् सफू ब्वंकादिसं
येँ – कोरोना भाइरस (कोभिड-१९)या कारणं वंगु मंगलवाः निसें नेपाः लकडाउनया अवस्थाय् लानाच्वंगु दु । सरकारं कोरोनाया संक्रमण जुइफुगु धासें छवाःया निंतिं छेँ नं पिहांमवनेत इनाप याःगु खः । आः तक प्यम्ह नेपाःमि याके थुगु भाइरस खनेवं सरकारं लकडाउनया ई अझ थप याइगु संकेत बिउगु दु ।
थज्याःगु अवस्थाय् छेँय् च्वनाः छिगु मस्त छु यानाच्वंगु दु ? छितः नं मस्तय्त छुं रचनात्मक ज्या याकेदुसा वा छुं शिक्षा बीगु ज्या यायेदुसा जिउ धकाः बिचाः जकं वयाच्वंगु मदुला ? यदि अथे खःसा थः मस्तय्त थःगु मांभासं हे मस्तय् बाखं ब्वंकादिसं । हानं थज्याःगु इलय् गन वनाः अज्याःगु सफू मालेगु धकाः बिचाः यानादिल जुइ ।
अज्याःगु सफू छिं पिहांवना न्याः वनेगु वा सुं नाप काःवनेगु आवश्यकता मदु । छिं छेँ च्वना सितिकं हे अज्याःगु सफू ब्वनादीफइ । व नं यइपुगु चित्र सहित । लेट्स रिड एसियां (Lets Read Asia) छिगु थ्व इच्छा पूवंकेगु ज्या यानाच्वंगु दु । लेट्स रिड एसियाया बेवसाइटय् ७०पु स्वयां अप्व मस्तय् बाखंया सफूत नेपालभासं उपलब्ध दु । बेवसाइटय् वनेत थन क्लिक यानादिसं ।
आः विश्वन्यंक महामारी जुयाच्वंगु कोरोना भाइरस सम्बन्धि सफू नं मस्तय्त थुइकेगु निंतिं थुकी दुथ्याकातःगु दु । थुकी जनकवि दुर्गालाल श्रेष्ठं च्वयादीगु पुलुपुलु गेरा, खाचा हँय्चा, हे माकः निसें कयाः नेवाःतय् भोटो जात्रा तकया मस्तय् सफू उपलब्ध दु । अथेहे मेमेगू देय्या मस्तय् सफूयात भाय् हीकाः नेवाः भासं तयातःगु मस्तय् सफू नं उपलब्ध दु ।
थुगु हे बेवसाइटय् खस नेपाली, थारू, तामाङ, अंग्रेजी, बंलागी नापं आपालं एसियाली देय्या भासं मस्तय् सफू तयातःगु दु । लेट्स रिड एसियाया मोबाइल एप डाउनलोड यानाः मोबाइलय् नं छिं मस्तय्त थज्याःगु सफू ब्वंकादिफइ ।
खस भासं ई-पुस्तकालय
ई-पुस्तकालयं निःशुक्ल रुपं खस नेपाली भासं सफू ब्वनेगु सुविधा शुरु याःगु दु । उगु अनलाइनय् खुद्वलं मल्याक सफूत तयातःगु दु । उगु अनलाइनय् मस्तय् निंतिं १ तगिं निसें १० तगिं तकया पाठ्यक्रम नं तयातःगु दु । उकी सफू जक मखसें भिडियो स्वया स्यनाकायेफइगुु सुबिधा तकं उपलब्ध याकातःगु दु । थुगु बेवसाइतय् स्वेत थन क्लिक यानादिसं ।
(ने. सं. ११४० चौलाथ्व ४ / वि. सं २०७६ चैत १५, शनिवाः)
LEAVE YOUR COMMENTS