जनबहाद्यःया खः मसालीगु

येँ – कोरोना भाइरसया खतराया कारणं थुगुसीया जनबहाद्यःया जात्रा नं मजुइगु जूगु दु । शुक्रवाः च्वंगु सेतो मच्छिन्द्रनाथ रथयात्रा व्यवस्थापन समितिया बैठकं थुगुसी जनबहाद्यःया खः मसालेगु क्वःछिउगु खः । समितिया संयोजक व येँ मनपा २५ वडाया अध्यक्ष निलकाजी शाक्यया अध्यक्षताय् गुथि संस्थानया अध्यक्ष मिनराज चौधरी, गुथि संस्थान येँ शाखाया प्रमुख हरिबहादुर सुबेदी, जनबहाःद्यःया द्यःपाःलाःपिं, थीथी क्लब, संघसंस्थाया प्रतिनिधिपिं दथुइ बैठक च्वनाः थ्व निर्णय याःगु खः ।

सहलहय् जनबहाःद्यःया आवश्यक विधिविधान कथं पुजा आजा जक यायेगु रथ यात्रा मयायेगु क्वःछिउगु खः ।

खः सालाः जात्रा यायेमफुगु खँय् जनबहाःद्यःयाके क्षमा याचना यानाः थुकिं भक्तजनप्रति जूवंगु भावनात्मक क्षति व सांस्कृतिक असुविधाप्रति क्षमा फ्वसें समितिं शुक्रवाः हे छगू वक्तव्य पिथँसें जात्रा मजुइगु जानकारी बिउगु खः ।