लकडाउन थप यायेगु तयारी

येँ – सरकारं कोरोना संक्रमण नियन्त्रणया निंतिं तयातःगु लकडाउनया ई थप यायेगु तयारी यानाच्वंगु दु । थुकिया निंतिं आवश्यक तयारी जुयाच्वंगु खँ धाःगु दु । लकडाउनया इलय् माःगु खाद्यान्नया सहज व्यवस्थापन यायेगु निंतिं सरकारपाखें उद्योगी व्यवसायीतय्त धायेधुंकूगु खँ धाःगु दु । याकनं हे थप लकडाउनया घोषणा जुइफुगु खँ धाःगु दु ।

विदेशं नेपाः दुहां वःपिं मनूतय् पूवंक परीक्षण मजूनिगुलिं लकडाउनयात थप यायेमाःगु खः । विदेशं दुहां वःपिनि परीक्षणया अन्तिम रिपोर्ट मवःतले लकडाउनय् हे तयेमालीगु खँ सरकारं कोरोना नियन्त्रणया निंतिं दयेकातःगु उच्चस्तरीय समन्वय समितिया छम्ह दुजलं धाःगु दु । वय्कलं आःया अवस्थाय् लकडाउनयात खुल्ला यायेमफइगु खँ धयादीगु दु ।

विदेशं लिहां वःपिंके कोरोना भाइरस खने दया वयाच्वंगुलिं नं सरकार लकडाउन थप यायेमाःगु निष्कर्षय् थ्यंगु खः । शुक्रवाः जक धनगढीइ दुबईं लिहां वःम्ह छम्हेसिके कोरोना संक्रमण खनेदुगु खः । थुकिया लिसें नेपालय् विदेशं वःपिं प्यम्हेसिके कोरोनाया संक्रमण खनेदयेधुंकूगु दु ।

सरकारं वंगु मंगलवाः छवाःया निंतिं लकडाउन घोषणा याःगु खः । आः घोषणा यानातःगु लकडाउन चैत १८ गते तकया निंतिं खः ।

ने.सं. ११४० चौलाथ्व ३ (२०७६ चैत १४)