ने. सं. ११४४ ञलाथ्व नवमी -

निजी स्कुल त्वःताः धमाधम सरकारीपाखे

येँ- कोरोना लिपा सामुदायिक स्कुलय् भर्ना जुइपिं विद्यार्थीतय् ल्याः धमाधम अप्वया वःगु दु । शैक्षिक सत्रया दथुइ चायेकूगु सामुदायिक स्कुलय् विद्यार्थीत अप्वया वःगु खः । खास यानाः निजी स्कुलय् आखः ब्वनाच्वंपिं विद्यार्थीत नं धमाधम स्कुल त्वःताः सामुदायिकपाखे वःगुलिं अन विद्यार्थी संख्या अप्वःगु खः ।

निजी (संस्थागत) स्कुलतय्सं स्कुल चायेकेवं मस्तय्के पूरा हे फी व अतिरिक्त शुल्क समेत कायेगु खँ न्ह्यःने हःगुलिं अन ब्वनीपिं विद्यार्थीत स्कुल त्वःताः धमाधम सरकारी स्कुलपाखे वःगु खः । शैक्षिक सत्र न्ह्याबलें वैशाखं शुरु जुइगु खःसां थुगुसी कोरोनाका कारणं मोहनि लिपा जक स्कुलतय्सं भौतिक उपस्थितिइ ब्वंकेगु याना हःगु खः । लकडाउनय् स्कुलतय्सं अनलाइन मार्फत ब्वंकेगु यानाच्वंगु खः ।

निजी विद्यालयं शैक्षिक सत्रया पूरा शुल्क काइगु खँ सीवं थः मचायात सामुदायिक विद्यालयय् यंकागु खँ इलाम सदरमुकामय् च्वनीम्ह छम्ह अभिभावकं कनादिल । थगुने निजी विद्यालयय् मस्तय्त ब्वंकाच्वंम्ह उम्ह अभिभावकं आः पुलांगु विद्यालयं वैकल्पिक माध्यमं ब्वंकाच्वंगु शुल्क समेत कायेगु धयाहःगु दु । उकिं थः मचायात सरकारी स्कुलय् तये हयागु खँ वय्कलं कनादिल । अनलाइनं ब्वंकाच्वंगु स्वयेबलय् पढाइ नं खास हे मपाःगु कारणं नं थःपिंसं स्कुल हिला बियागु खँ नं वय्कलं कनादिल ।

थगुने थें थुगुसी भर्ना अभियान याके मफुत । अथे खःसां थुगुसी सामुदायिक विद्यालयया शिक्षकतय्सं अभियान हे चले मयाःसां नं विद्यार्थीत वःगु खँ कंगु दु । न्हापाया तुलनाय् थुगुसी झण्डै ३० प्रतिशत विद्यार्थी अप्वःगु खँ इलामया सदरमुकामस्थित आदर्श माध्यमिक विद्यालयया शिक्षक शिरोमणि भट्टराईनं कनादिल ।

तर जिल्लाया स्कुलय् विद्यार्थी अप्वःसां विद्यालयय् धाःसा स्रोत साधन व्यवस्थापनया समस्या दुगु खँ नं सीदुगु दु । अथे खःसां भर्ना धाःसा न्ह्याक्व वःसां याके हे माःगु बाध्यता दुगु खँ नं स्कुलतय्सं धाःगु दु ।

संस्थागत विद्यालयय् थुगुसी विद्यार्थी घटे जूगु खँ निजी तथा आवासीय विद्यालय अर्गनाइजेशन (प्याब्सन) इलामया अध्यक्ष विकास कर्माचार्यं स्वीकार यानादिल । अप्वः अभिभावकतय्सं आः वयाः छेँया सतिक च्वंगु स्कुलय् हे मस्त ब्वंकेगु शुरु याना हःगु खने दयाच्वंगु दु ।
निजी स्कुलया मस्तय्त सरकारी स्कुलय् भर्ना याये यंकूसां न्हापा ब्वंगु स्कुलपाखें स्थानान्तरण कया मयंकूगु कारणं यानाः धाःसा मस्तय्त समस्या जुयाच्वंगु खँ सरकारी स्कुलतय्सं धाःगु दु । (रासस)