पानीजहाज चले यायेत निगू कम्पनी इच्छुक

येँ – सरकारं पानीजहाज कार्यालय नीस्वनेवं अन्तर्राष्ट्रिय समुद्रय् पानीजहाज संचालन यायेत इच्छुक कम्पनीत वःगु दु । नेपाली ध्वाँय् क्वय् अन्तर्राष्ट्रिय सामुद्रिक क्षेत्रय् व्यापारीक पानीजहाज चले यायेत निगू पुचलं इच्छा प्वंकूगु खँ धाःगु दु । थुकिया निंतिं अनुमति कायेत यलय् च्वंगु नेपाली पानीजहाज कार्यालयय् उगु कम्पनीत थ्यंगु दु ।

पानीजहाज कार्यालयं अनुमति बीधुंकाः जक समुद्रय् नेपाःया ध्वाँय् ब्वयेकाः पानीजहाज चले यायेदइ । कार्यालयया रजिष्ट्रार ऋषिराम कोइरालां व्यापारिक पानीजहाज चले यायेगु इच्छा प्वंकाः निगू प्रस्तावित कम्पनीं अनुमति काःवःगु खँ धयादीगु दु ।

‘नेपाली ध्वाँय् ब्वयेकाः व्यापारिक पानीजहाज संचालन यायेगु निंतिं दर्ता यायेत निगू कम्पनी वःगु दु, तर अनुमति बीगु निंतिं जिमिके छुं ऐन कानुन हे मदुगुलिं बीफयाच्वंगु मदु’ वय्कलं धयादीगु दु । अःखबतं दर्ता यायेत वःगु कम्पनीया हे मनूतय्सं थःपिंसं कानुन दयेकेत ग्वाहालि यायेगु तकं धयाच्वंगु दु ।

पानीजहाज कार्यालयं थौंकन्हय् समुद्रय् नेपाली ध्वाँय् ब्वयेकाः पानीजहाज संचालन यायेगु निंतिं आवश्यक कानुन दयेकाच्वंगु दु । कानुन दयेकेधुंकाः कम्पनी दर्ता यानाः समुद्रय् पानीजहाज संचालन याकेगु ज्या जुइ । वि.सं. २०२७ सालय् दयेकातःगु पानीजहाज सम्बन्धी ऐन आःया अन्तर्राष्ट्रिय कानुन कथं मजूगुलिं न्हूगु कानुन दयेकेगु सुरु जूगु खँ रजिष्ट्रार कोइरालां धयादीगु दु ।

अनुमतिया निंतिं इच्छा प्वंकुसां अनुमति बीगु निंतिं कानुन हे मदयेकूनि

वि.सं. २०२७ सालय् हे नेपाली ध्वाँय् ब्वयेकाः समुद्रय् पानी जहाज संचालन यायेगु निंतिं पानीजहाज दर्तासम्बन्धी ऐन २०२७, नेपाली पानीजहाज दर्ता नियमावली २०२८, नेपाली पानीजहाज ऐन २०२७ व नेपालया व्यापारिक पानीजहाजको झण्डा सम्बन्धी ऐन २०२७
दयेकातःगु दु ।

रजिष्ट्रार कोइरालां विज्ञ पुचःया ग्वाहालि कयाः कार्यालयं कानुन दयेकेगु ज्या यानाच्वंगु खँ धयादीगु दु । कार्यालयं थ्व हे आर्थिक दँय् विज्ञ समूह हयाः कानुन दयेकेगु धाःसां प्राविधिक कारणं दयेके मफुगु खँ कार्यालयया सिनियर डिभिजनल इञ्जिनियर विपिन राजभण्डारीं धयादिल ।

वय्कलं विज्ञ समुह हयाः ऐन हयेगु ज्या अझं ई काइतिनिगु खँ नं धयादीगु दु । वय्कलं ऐन दयेकाः अनुमतिपत्र बीगु निंंि अझं झिला ति लगे जुइगु खँ धयादीगु दु । अन्तर्राष्ट्रिय सामुद्रिक क्षेत्रय् पानीजहाज संचालन यायेत २७ गू अन्तर्राष्ट्रिय महासन्धिया पालना यायेमाः । कार्यालयं इन्टरनेशनल मेरिटाइन अर्गनाइजेशन (आइएमेओ)या नियम पालना यायेमाः ।

मेरिटाइन अर्गनाइजेशन पानीजहाज सम्बन्धी नियम पालना याकीगु अन्तर्राष्ट्रिय संस्था खः । अथेहे पानीजहाज कार्यालयं न्हापांखुसी आन्तरिक जलयान संचालनया निंतिं ‘जलयान संचालन सम्बन्धी नियमावली’ नं हयेगु तयारी यानाच्वंगु दु । थ्व नियमावली वल धायेवं कोशी व नारायणीइ जलयान संचालन यायेफइ ।

थीथी ऐन व नियमावली दयेकेगु तयारी जुयाच्वंसां कार्यालयय् अप्वः थें कर्मचारी अर्धदक्ष जक दु । पानीजहाज सम्बन्धी ज्या यायेत दक्ष जनशक्ति माःगु खःसां अप्वः कर्मचारी अर्धदक्ष जक दुगु खँ सिनियर डिभिजन इन्जिनियर राजभण्डारीं धयादिल । थौंकन्हय् कार्यालयय् न्याम्ह इन्जिनियरलिसे झिंखुम्ह कर्मचारी दु । सरकारं समुद्रय् पानीजहाज संचालनया निंतिं वंगु फागुन २ गते थ्व कार्यालय् चायेकूगु खः ।

सम्बन्धित बुखँ

LEAVE YOUR COMMENTS