‘ब्याजदर तत्काल म्हो यायेफइमखु’
येँ – बैंकर संघया अध्यक्ष ज्ञानेन्द्र ढुंगानां तत्काल बैंकया ब्याजदर म्हो यायेमफइगु खँ धयादीगु दु । वय्कलं ब्याज दर म्हो यायेगु निंतिं बैंकतय्के तत्काल छुं उपाय मदु धासें बैंकया ब्याजदर म्हो यायेमफइगु खँ धयादीगु खः । नेशनल बैंकिङ्ग इन्ष्टिच्यूट झिदँ क्यंगु लसताय् ग्वसाः ग्वःगु ‘दि डेलिब्रेसन फर नेक्स्ट डिकेड’ ज्याझ्वलय् न्ववानादिसें अध्यक्ष ढुंगानां थौंकन्हय् थःपिनिगु बेस रेट हे १० प्रतिशत तक थ्यनाच्वंगु दु धयादिसें थज्याःगु अवस्थाय् त्यासाया ब्याजदर म्हो यायेफइमखु धयादिल ।
वय्कःया कथं बैंकतय् दथुइ थौंकन्हय् शाखा विस्तार यायेगु होडबाजी जुयाच्वंगु दु व गांगामय् शाखा विस्तार यायेगु झ्वलय् बैंकतय् अपरेटिङ्ग कस्ट व कम्प्लाइन्स कस्ट तसकं अप्वया च्वंगु दु । अथेहे त्यासाया माग कथं बचत मुंके मफयाच्वंगुलिं अप्वः ब्याज पुलाः बचत हये मालाच्वंगु दु । थुकिं यानाः बेस्ट रेट हे अप्वयाच्वंगुलिं तत्काल त्यासाया ब्याज म्हो यायेमफइगु खँ वय्कलं धयादीगु खः ।
अर्थमन्त्री युवराज खतिवडां धाःसा बैंकतय्सं ब्याज म्हो मयात धाःसा सरकारं हस्तक्षेप यायेगु ख्याच्वः बियादीगु दु । थुगु हे ज्याझ्वलय् न्ववानादिसें अर्थ मन्त्री खतिवडां बैंकया ब्याजदर अप्वःगुलिं विजनेश कम्युनिटी आन्दोलनय् कुहां वयाच्वंगुलिं बैंकतय्सं उमिगु माग संवोधन यायेमाः धयादिल । बंैकतय्त ब्याज दर म्हो यायेत इनाप यानादीसें वय्कलं यदि मजुल धाःसा सरकारं हस्तक्षेप यायेगु ख्याच्वः बियादीगु खः ।
ज्याझ्वलय् न्ववानादीम्ह गभर्नर चिरञ्जिवी नेपाल धाःसा ब्याज दरया खँय् मौन च्वनादीगु दु । वय्कलं ज्याझ्वलय् बैंकतय् शाखा विस्तार जुयाः वनाः नेपाःया बैंक व वित्तीय संस्थातय्सं जनतातक पहुँच थ्यंकूगु खँ जक न्ववानादिसें ब्याज दरया खँय् धाःसा छुं प्रतिक्रिया बियामदीगु खः ।
LEAVE YOUR COMMENTS