मेलम्चीया लः सुरुङय् वल, हितिइ गबले ?

येँ – वंगु ३० दँ न्ह्यवंनिसें चर्चाय् वयाच्वंगु मेलम्चीया लः थ्वहे वइगु असारंनिसें छेँय् छेँय् च्वंगु हितिं हाइ धकाः सरकारं धाःसां जनता धाःसा अझं पत्याः जुयाच्वंगु मदुनि । थ्वहे झ्वलय् वंगु प्यन्हुजालय् मेलम्ची खुसिया लः सुरुङय् दुछ्वयेगु ज्या सरकारं सम्पन्न याःगु दु । खुसिया लः सुरुङय् वन, आः हितिइ नं वइ धइगु आशा ब्वलंकेत थ्व ज्या यानागु खँ मेलम्ची विकास समितिं धाःगु दु ।

समितिपाखें न्हापा यानातःगु योजना कथं यदि फुक्क ज्या इलय् क्वचाल धाःसा मेगु दँया असार तक मेलम्चीया लः येँय् च्वंगु सुन्दरीजलस्थित रिजभ्र्वाएरय् क्वफाये फइ । मेलम्ची विकास समितिया कथं सुन्दरीजलय् लः क्वफाःगुयां झिंन्यान्हुया दुने पुलांगु हे पाइपपाखें हितिइ लः वितरण यायेगु ज्या जुइ । न्हूगु पाइपपाखें लः वयेत धाःसा अझ नं छुं ई काइतिनिगु खँ धाःगु दु ।

मेलम्चीया लः वितरणया लागिं स्वनिगः दुने करिब ७५ किलोमिटर न्हूगु पाइप लायेमाःगु योजना दु । उकी मध्ये ६५ किलोमिटर पाइप लायेगु ज्या क्वचायेधुंकूगु दुसा ल्यं दुगु थासय् अझं ज्या जुयाच्वंगु दनि । पाइप लाये सिधःगु थासय् नं मेलम्चीया लः हयेत फुक्कं पाइप सफा याये मानिगु जूगुलिं न्हूगु पाइपं लः वयेत लछिंनिसें खुला–न्हय्ला तक ई काइगु खँ धाःगु दु ।

तर न्हूगु वा पुलांगु पाइपं लः वयेत दकलय् न्हापां मेलम्चीया लः अन दयेकूगु सुरुङ पार यानाः सुन्दरीजल तक निं थ्यनेमाःगु आवश्यक जुइ । थ्व लः असार तक सुन्दरीजल थ्यनी धइगु खँय् हे मनूतय्सं विश्वास यानाच्वंगु मदुनि । मेलम्चीइ हे थौंकन्हय् गुगु ज्या जुयाच्वंगु खः, थ्व फुक्क ज्या थ्वहे वइगु असोज महिना तक सिधइगु अनुमान यानातःगु दु । तर अन ज्याया जिम्मा काःगु ठेकेदारतय्सं अन यायेमाःगु ज्या गुलि याकनं सिधयेकी धइगु खँय् धाः