शिक्षकत नं आन्दोलनय्

येँ – नेपाल शिक्षक महासंघ नं आन्दोलनय् कुहां वइगु जूगु दु । महासंघं मंगलवाः छगू पत्रकार सम्मेलन यासें वइगु असोज २१ गते निसें आन्दोलनय् कुहां वयेगु घोषणा याःगु दु । शिक्षक संस्था व सरकार दथुइ न्हापा जूगु सम्झौता कार्यान्वयन मजूगुलिं आन्दोलनय् कुहां वयेमाःगु खँ महासंघया अध्यक्ष बाबुराम थापां धयादीगु दु ।

महासंघं निवृत्त शिक्षक व फुक्कं स्थायी शिक्षकतय् निवृत्तिभरण, उपदान व वासः खर्च संघीय सरकारं बीमाःगु, विद्यालय कर्मचारीया तहगत दरबन्दी सिर्जना यानाः वहे कथं पारिश्रमिक क्वःछीमाःगु, अस्थायी शिक्षकतय्त स्थायी दरबन्दीइ रुपान्तरण यायेमाःगु माग याना वयाच्वंगु खः । महासंघं पत्रकार सम्मेलन यासें असोज २१ निसें मंसिर २१ गते तकया आन्दोलन कार्यक्रम घोषणा याःगु खः ।