मेयरया कारणं झण्डै दुर्घटना

येँ (नेपालभाषा टाइम्स)÷घटना वंगु म्हपुजा कुन्हुया खः । येँया सिनामंगलय् सम्पदा संरक्षण महाअभियानया ग्वसालय् जूगु छगू भिंतुना सभाय् येँ मनपाया मेयर बालेन साहं नेपाली सेना व सर्वसाधारण दथुइ हिंसात्मक भिडन्त याकेत स्वःगु द्वपं लाःगु दु । उगु ज्याझ्वलय् वय्कलं बियादीगु अभिव्यक्तियात स्वयम् ग्वसाः खलःया दुजःतय्सं हे कडा आलोचना याना हःगु दु ।

सिनामंगलस्थित त्रिभुवन विमानस्थल लागा दुने शंखधर साख्वाःलिसे सम्बन्धित पुरातात्विक अवशेषत दनि धइगु अनुमान यासें महाअभियानं वहे थासय् भिंतुना ज्याझ्वः यायेगु ग्वसाः ग्वःगु खः । तर विमानस्थल लागा जूगु कारणं उगु थाय्यात तारया बारं घेरा लगे यानाः सेनां सुरक्षा बियातःगु दु । ग्वसाः खलकं उगु थासय् दुहां वनेगु लागिं लुखा चायेका बी माल धकाः इनाप यानाच्वंगु खःसां सेनां लुखा चायेका मबिउ ।

लिपा ज्याझ्वः शुरु जुइकाः मेयर साह नं अन थ्यंकः वल । वय्कलं दबुलिइ सम्बोधन यासें छक्वलं हे बार तछ्यायेत आह्वान यानादिल । सेनां मजिउ धाःसां थःपिं माने यायेगु पक्षय् मदु धासें गोलीं कयेकूसां कयेके बिउ, तर बार तछ्यानाछ्व धकाः आदेश बियादीगु खः । तर ग्वसाः खलःया न्ह्यलुवा यादवलाल कायस्थं ‘मखु मखु, बार तछ्यायेगु मखु’ धासें मुनाच्वंपिं मनूतय्त पनादिल ।

ग्वसाः खलःया दुजः रवि शाक्यं कनादीकथं यदि वकुन्हु अन बार व गेट तछ्यायेगु ज्या जूगु खःसा तःधंगु हे दुर्घटना जुइगु खः । छाय्धाःसां गुगु थासय् गेट तछ्यायेगु खँ जूगु खः, व थाय् अन्तर्राष्ट्रिय विमानस्थल थेंज्याःगु संवेदनशील क्षेत्र खः । उगु थाय्या सुरक्षाया लागिं अन नेपाली सेना कम्ब्याट ड्रेसय् तयारी अवस्थाय् तयातःगु दु । छुं जुयाः अन हुलदंगा याःगु जूसा सेनां तप्यंक गोली हे चले याइ । नापं विमानस्थल थेंज्याःगु संवेदनशील क्षेत्रय् हुलदंगा याः वल धकाः अन्तर्राष्ट्रिय क्षेत्रय् नं बदनाम जुइ । विमानस्थलय् हुलदंगा याः वल धइगु द्वपनय् ज्वना यंकल धाःसा महिनौं जेलय् तया बी ।

उगु इलय् मेयर साहं म्हितूगु भूमिका तसकं अशोभनीय खः धासें अभियन्ता शाक्यं थःगु बिचाः प्रकट यानाः छगू भिडियो हे सार्वजनिक यानादीगु दु । वय्कलं उकी धयादीगु दु, ‘मेयरं न्ववानादीगु अभिव्यक्तिं अन तःधंगु हे भाँडभैलो जुइत्यंगु खः । वय्कः थेंज्याःम्ह मनुखं अज्याःगु अभिव्यक्ति बीगु पाय्छि मखु । यदि अन गेट तछ्यायेगु हे खःसा उकिया लागिं मेयरं स्यनाच्वनेम्वाः । व जिमिसं हे तछ्यायेफु । मेयरया कारणं जुइत्यंगु छगू तःधंगु हे दुर्घटनां सकलें बचे जुल ।’

मेयर थेंज्याःगु पदय् च्वनाच्वंम्ह मनुखं नेपाली सेनां सुरक्षा बियातःगु संवेदनशील क्षेत्रय् गेट तछ्याना छ्व धकाः बियादीगु अभिव्यक्ति अतिकं गैर जिम्मेवार, गैर कानुनी व अराजक जूगु खँ ग्वसाः खलकं हे धाःगु दु ।

थःगु अभिव्यक्तियात कयाः कडा आलोचना जूसां मेयर साहं धाःसा आः तक उकियात कयाः थःगु बिचाः बियादीगु मदुनि ।