‘गुगुं नं इलय् देय् लक डाउन जुइफु’
येँ (नेपालभाषा टाइम्स)÷कोरोना भाइरसया कारणं गुगुं नं इलय् देय्यात ‘लक डाउन’ य् यंके मालीगु खँ उपप्रधान लिसें रक्षामन्त्री ईश्वर
पोखरेलं धयादीगु दु । म्हिगः अनलाइन पत्रकारतलिसे खँ ल्हासें वय्कलं उगु खँ धयादीगु खः । थौंकन्हय् विश्वन्यंकं न्यना वनाच्वंगु कोभिड–१९ विरुद्धया लडाईं गुकथं ल्वायेगु धइगु योजना दयेका च्वनागु खँ कँसें वय्कलं सरकारया योजनायात आम जनतां नं तिबः बीमाःगु खँ धयादिल । ‘सरकार याकःचां यानाः छुं जुइ मखु, गबले तक जनतां सरकारं हःगु ज्यायात समर्थन याइ मखु अबले तक ताःलाइ मखु । आः हे नं
सरकारं सार्वजनिक ज्याझ्वः मयायेत इनाप यायेधुनागु दु, तर गुलिखे पासापिं थः हे निर्वाचन क्षेत्रया ज्याझ्वः धकाः वनाच्वंगु दु’ वय्कलं धयादिल । वय्कलं विश्वन्यंकं कोरोना न्यना वनेवं सरकारं माःगु संयन्त्रया व्यवस्था याःगु खँ कँसें फयांफछि संक्रमण दुमकायेगु थःपिनि ग्वसाः दुगु खँ नं कनादिल ।
कोरोनां नेपाःयात लाके फइगु प्रभाव बारे सुक्ष्म अध्ययन यायेगु लिसें जनतायात सचेत यायेगु ज्या सरकारं यानाच्वंगु खँ नं वय्कलं कनादिल । विश्वन्यंकं न्यना वनाच्वंगु संक्रमणयात नेपालय् पनेत सरकारं नेतृत्व जक याये फइ धासें वय्कलं जनतां उकी सरकारयात ग्वाहालि यायेमाःगु खँय् बः बियादिल । आःया संक्रमण इलय् सामाजिक व्यवहारय् नं नियन्त्रण यायेमाः धासें छुं न्हिया निंतिं सामाजिक गतिविधि पनेमाःगु बिचाः नं वय्कलं तयादिल ।
तःधंगु इहिपा भ्वय्, ततःधंगु पार्टी लिसें मेगु गुलिखे सामाजिक भेलायात सरकारं जबर्जस्ति पने फइ मखु धासें अज्याःगु ज्याझ्वःयात जनता थःपिं हे जानाः पनेमाःगु खँय् नं बः बियादिल ।आःया अवस्था जनताया जीवनलिसे स्वानाच्वंगु दु धासें थुकिं जनता गम्भीर जुइमाःगु खँ नं वय्कलं धयादीगु दु ।
LEAVE YOUR COMMENTS