नेपाः नामिबयालिसे प्यंगू विकेटं बुत

एजेन्सी- आइसीसी विश्वकप क्रिकेट लिगया न्हापांगु कासाय् नेपाः नामिबियालिसे पराजित जूगु दु । त्रिवि मैदानय् जूगु कासाय् नेपाःयात नामिबियां प्यंगू विकेटं बुकूगु खः ।
कासाय् टस बुनाः न्हापां ब्याटिङ याःगु नेपालं ४१.१ ओभरय् मुक्कं १३२ रन जक दयेकाः अलआउट जूगु खः । घरेलु मैदानय् थ्व नेपाःया आःतक हे दकलय् म्हो स्कोर खः । नेपाःया निंतिं दकलय् अप्वः रन भीम सार्कीं दयेकूगु खः । भीमं ४४ रन दयेकूगु खः ।

अथेहे गुल्शन झां २१ रन, कुशल मल्लं १५ रन, पवन शर्राफं १२ रन, करण केसीं १६ रन दयेकूगु खः । मेपिं कासामितय्सं धाःसा निगू अंकया रन तकं दयेकेमफुत । नेपाःया कप्तान रोहित पौडेल छगू जक रन दयेकाः आउट जूगु खः । नेपाःयात म्हो रनय् अलआउट यायेगु झ्वलय् नामिबियाया कप्तान जेरार्ड एरास्मसं न्यागू विकेट काःगु खः । अथेहे रुबेन ट्रम्पेलमेन व याक ब्रोेसेलं निगू निगू विकेट व जान निकोलं छगू विकेट काःगु खः ।

नेपालं बिउगु १३३ रनया सामान्य लक्ष्य ज्वनाः मैदानय् वःगु नामिबियां ३३.१ ओभरय् खुगू विकेटया क्षतिइ लक्ष्य पुवंकूगु खः । नामिबियाया निंतिं फ्राइलिंकं दकलय् अप्वः ३४ रन दयेकूगु खः । नेपाःया निंतिं सोमपाल कामीं स्वंगू, ललित राजवंशीं निगू व कप्तान रोहित पौडेलं छगू विकेट काःगु खः । मोन्टी देशाइ प्रशिक्षक जुइधुंकाः घरेलु मैदानय् जूगु एकदिवसीय कासाय् नेपाःया थ्व न्हापांगु पराजय खः । नेपालं घरेलु मैदानय् झ्वःलाकः १५ गू कासा त्याकेधुंकाःलि थ्व कासाय् पराजित जूगु खः । नेपालं आः सिरिजया मेगु कासा नेदरल्याण्ड्सलिसे शनिवाः म्हिती ।