आः राष्ट्रपति व उपराष्ट्रपति चुनावया तयारी
येँ (नेपालभाषा टाइम्स)÷ निर्वाचन आयोगं राष्ट्रपति व उपराष्ट्रपतिया निर्वाचन यायेगु तयारी न्ह्याकूगु दु । राष्ट्रपति व उपराष्ट्रपतिया निर्वाचन सम्बन्धी ऐन, २०७४ कथं राष्ट्रपतिया पदावधि क्वचाये स्वयां म्होतिं नं लछि न्ह्यः निर्वाचन जुइकथं निर्वाचनया तिथि क्वःछीमाःगुलिं आन्तरिक सहलह शुरु जूगु खँ आयोगया सहायक प्रवक्ता सूर्यप्रसाद अर्यालं कनादीगु दु ।
वर्तमान राष्ट्रपतिया कार्यकाल वइगु फागुन २९ गते क्वचाइगु जूगुलिं माघ २८ गते दुने निर्वाचन याकेगु तयारी आयोगं याःगु दु । संविधानया धारा ६३ सं राष्ट्रपति व उपराष्ट्रपतिया कार्यकाल निर्वाचित जूगु तिथिं न्यादँ क्वःछिनातःगु दु । आयोगं निर्वाचनया तिथि क्वःछिनाः सरकारयात बीमाःगु व्यवस्था दु ।
संविधानया धारा ७० कथं राष्ट्रपति व उपराष्ट्रपतिइ बिस्कं लिंग वा समुदायपाखें प्रतिनिधित्व याकेमाःगुलिं निगुलिं पदया छक्वलं मखुसें बिस्कं बिस्कं तिथिइ निर्वाचन यायेमाःगु व्यवस्था दु । थ्व चुनावय् ३३४ म्ह् संघीय सांसद व प्रदेशसभाया ५५० म्ह सांसद मतदाता जुइ । देय्या विद्यमान जनसंख्या कथं थुगु पदया निर्वाचनया नितिं संघीय संसदया दुजःया मतभार ७९ व प्रदेशसभाया मतभार ४८ जुइ ।
आयोगं वंगु मंसिर ४ गते क्वचाःगु प्रतिनिधिसभा व प्रदेशसभा दुजः निर्वाचनया लिच्वः सहितया प्रतिवेदन वंगु मंसिर २९ गते प्रतिवेदन राष्ट्रपति विद्यादेवी भण्डारीयात लःल्हाःगु खः । राष्ट्रपति भण्डारीया आह्वान कथं वंगु पुस १० गते सरकार गठन जुइधुंकूगु दु । सरकार गठनया ज्या क्वचायेवं आयोगं राष्ट्रपति व उपराष्ट्रपतिया निर्वाचन प्रक्रिया न्ह्याकूगु खः ।
राष्ट्रपति व उपराष्ट्रपतिया निर्वाचनय् ज्या यायेत आयोगं न्याय परिषदया परामर्शय् उच्च अदालतया न्यायाधीशयात निर्वाचन अधिकृत नियुक्त याइ । निर्वाचनय् उम्मेदवार जुइत संघीय संसदया दुजःया नितिं दयेमाःगु योग्यताया लिसे म्होतिं ४५ दँ पूवंम्ह व छुं नं कथंया कानुनं अयोग्य मजूम्ह जुइमाः । निर्वाचनय् मनोनयनया नितिं मतदाता नामावलीइ नां दुथ्याःपिं न्याम्ह प्रस्तावक व न्याम्ह समर्थक माःगु कानुनी व्यवस्था दु ।
LEAVE YOUR COMMENTS