न्यागू देय्या खाद्यान्न आयात बन्द

येँ – सरकारं कोरोना भाइरस संक्रमण जूगु देशं खाद्यान्न आयात यायेगु ज्या पनाबिउगु दु । सरकारं चीन, दक्षिण कोरिया, इटाली, इरान व जापानं जुइगु तरकारी, फलफूल व ला आयात यायेगुली प्रतिबन्ध तःगु खः । खाद्य प्रविधि तथा गुण नियन्त्रण विभागया प्रवक्ता मोहनकृष्ण महर्जनया कथं आःया स्थिति न्यागू देशं आयात यायेगु निंतिं फ्वंगु अनुमति जारी यायेगु ज्या बन्द जुयाच्वंगु जानकारी बियादीगु दु ।

कृषि तथा पशुपंछी विकास मन्त्रालयं कोरोना भाइरसं तसकं प्रभावित न्यागू देशं पशु, खाद्य व वनस्पतिजन्य वस्तुया आयात अनुमति मबीत विभागयात पत्राचार यायेवं विभागं ड्राइफुड, स्न्याक्स व स्याउ लगायत खाद्यान्न वस्तुयात बिया वयाच्वंगु अनुमति बन्द याःगु खः ।
सरकारया निर्णय लिपा नेपालय् फलफूललिसें थीथी वस्तुया बजाः भाः थहां वनेफुगु खँ धाःगु दु ।

नेपालय् थौंकन्हय् चिनियाँ स्याउ, म्वाःम्ह पशुपंछी, वनस्पतिया पुसा, लाया परिकार, चकलेट व वनस्पति चिकं आयात यायेगु यानाच्वंगु दु । उकथं हे जापान, इटाली व कोरिया नं थीथी खाद्यान्न आयात याना वयाच्वंगु दु ।