उच्चशिक्षाया निंतिं विदेशी वनीपिं अप्वल

न्हापा एसएलसी व आः एसईई परीक्षा लिपा प्लस टु सिधयेकाः उच्च शिक्षा अध्ययनया निंतिं विदेशी वनीपिं विद्यार्थीतय् ल्याः लिपांगु इलय् तीव्ररुपं अप्वया वनाच्वंगु दु । आतकया दुने नेपाली विद्यार्थीत उच्च शिक्षा अध्ययनया निंतिं धकाः विश्वया ७२ गू देशय् तक थ्यनेधुंकूगु सीदुगु दु ।

देय् समृद्धिया लँपु न्ह्याः वनेगु धुंकूगु धकाः म्हगस क्यनेगु व खंकेगु ज्या जूसां देय्या उच्च शिक्षा व रोजगारीप्रति विश्वस्त जुइमफुपिं इपिं विद्यार्थीत विदेशी उच्च शिक्षाय् आकर्षित जुयाच्वंगु खनेदु । शिक्षा, विज्ञान व प्रविधि मन्त्रालय माहतहतया केशरमहलस्थित छात्रवृत्ति शाखाया कथं चालु आर्थिक दँय् आतकया दुने जक विश्वया ७२ गू देय्या शिक्षालयय् उच्च अध्ययनया निंतिं धकाः ख्वीनिद्वः व निसःम्ह विद्यार्थीं स्वीकृति पत्र (नो अब्जेक्स पौ) कायेधुंकूगु दु । थ्व तथ्यांक वंगु निदँ न्ह्यःया आर्थिक दँया तुलनाय् निदुगं अप्वः खः ।

आर्थिक दँ २०७२÷०७३य् थुकिया झण्डै बछिया ल्याखय् अर्थात ३२,४८९ विद्यार्थीं विदेशय् उच्च शिक्षा अध्ययनया निंतिं स्वीकृति काःगु खः । आ.व. ०७३÷७४ य् वयाः थ्व ल्याः अप्वयाः वनाः ५०,६५९ थ्यंगु खःसा चालु आर्थिक दँ सिधयेत निलाया ई ल्यं दुगु इलय् थ्व ल्याः अप्वया वनाः ख्वीनिद्वलं मल्याक विद्यार्थीं स्वीकृति पत्र कायेधुंकूगु दु ।

शाखाया प्रमुख देवीप्रसाद उपाध्याय पौडेलयाकथं न्हिं सरदर निसःया ल्याखय् विद्यार्थीतय्सं उच्च शिक्षाया निंतिं स्वीकृत पत्र कायेगु यानाच्वंगु दु । स्वीकृति पत्र मकासे विदेशय् उच्च शिक्षा अध्ययनया निंतिं वनीपिं विद्यार्थीतय् ल्याः सरकारी अभिलेखय् खने दइमखु धाःसा स्वीकृति काःपिं सकलें विद्यार्थीं नं अध्ययनया निंतिं हे धकाः जक काःगु नं खनेमदु । गुलिखे विद्यार्थीतय्सं अध्ययनया निंतिं धकाः अनुमति कयाः रोजगारय् लगे जुयाच्वंपिं नं दुसा गुलिखे विद्यार्थीं अध्ययन नापं रोजगारीयात नं न्ह्यःने यंकाच्वंगु दु ।

उच्च शिक्षा अध्ययनया निंतिं थुगु दँय् विद्यार्थीतय्सं दकलय् अप्वः ययेकूगु देय् धइगु अस्ट्रेलिया खः । थ्व ल्याखं उच्च शिक्षा अध्ययनया निंतिं अस्टेलिया विद्यार्थीतय् ‘च्वाइस’य् न्हापांगु थासय् लाःगु दु । चालु आर्थिक दँया साउन २ गतेनिसें आतकया दुने प्राप्त विवरण कथं उगु देशय् वनेत स्वीस्वद्वः विद्यार्थीं स्वीकृति पत्र काःगु दु । अथे हे थुगु दँय् वंगु जेठ तकया अवधि दुने जापानया निंतिं ११,०९४, संयुक्त राज्य अमेरिकाया निंतिं २,४५८, चीनया निंतिं १,९९६, भारतया निंतिं ९७०, पोल्याण्डा निंतिं १,४३२, क्यानाडाया निंतिं १,१८६ व दक्षिण कोरियाया निंतिं १,०८६ विद्यार्थीं उच्च शिक्षा अध्ययनया निंतिं स्वीकृति पत्र काःगु खनेदु ।

रोमानिया, भियतनाम, युक्रेन, आइसल्याण्ड थेंज्याःगु देय्या निंतिं छम्ह निम्ह विद्यार्थीं जक अध्ययन स्वीकृति काःगु दु । शाखाया प्रमुख पौडेलं अध्ययन स्वीकृति पत्रया निंतिं सरलीकृत व याकनं यायेत आवश्यक दक्वं भ्वं पेस जूगु खण्डय् बाघौया दुने स्वीकृति पत्र बीगुकथं प्रबन्ध यानागु जानकारी बियादिल । उच्च शिक्षा अध्ययनया निंतिं धकाः उकथं स्वीकृति पत्र काइपिं विद्यार्थीमध्ये मिसा व मिजं विद्यार्थीया बिस्कं बिस्कं तथ्यांक धाःसा शाखां तयातःगु मदु ।

नेपाल शैक्षिक परामर्शं संघ (इक्यान)या अध्यक्ष विष्णुहरि पाण्डें उच्च शिक्षाया निंतिं पिहां वनीपिं विद्यार्थीया ल्याः व देय् ह्वात्त अप्वःगु अनपेक्षित जूगु धासें थ्व संख्या दक्वं अध्ययनया निंतिं जक वंगु खइमखु धयादिल । ‘विद्यार्थीतय्त इमिगु क्यारियर व काउन्सिलिङ याना वयाच्वंपिं झिंन्यासः स्वयां अप्वः परामर्श संघं गुकथं इमित परामर्श बियाच्वंगु दु, ताकि उखे वनेधुंकाः बांलाक अध्ययन याये फयेमा, केबल ब्वनेगु नामय् ज्याया निंतिं मवनेमा धइगु खँय् जिमिगु नं मुख्य भूमिका जुइ’ वय्कलं धयादिल ।

वय्कलं नेपालय् प्रत्यक्ष विदेशी लगानी (एफडीआई) मार्फत शैक्षिक परामर्श सेवाय् नं विदेशी लगानी वयेत स्वयाच्वंगु खँय् थःपिनिगु विरोध दुगु धयादिल । अस्टे«लियाली कम्पनीं नेपालय् थ्व क्षेत्रय् लगानी यायेत पहल यानाच्वंगु दु । अथे जुल धाःसा नेपालय् परामर्श केन्द्र धरासायी जुइगु व नेपाःया पूँजी नं विदेश पलायन जुइगु खतरा दुगु वय्कःया धापू दु ।
(रासस)