जेठ २३ निसें हिमालयन ट्राभल मार्ट

येँ – नेपाःया पर्यटन क्षेत्रया तःजिगु मेलाया रुपय् कयातःगु ‘हिमालयन ट्राभल मार्ट’ या स्वक्वःगु संस्करण वइगु जेठ २३ निसें २६ तक येँय् जुइगु जूगु दु । नेपाःयात हिमालय दुहां वयेगु व साहसिक पर्यटनया केन्द्र लिसें सवल पर्यटनमैत्री गन्तव्यया रुपय् विश्वया न्ह्यःने स्थापित यायेगु आज्जु कथं ‘मार्ट’ या ग्वसाः ग्वयेत्यनागु खँ ग्वसाः खलः प्यासिफिक एसिया ट्राभल एशोसिएशन (पाटा) नेपाल च्याप्टरं धाःगु दु ।
ग्वसाः खलकं सन् २०१७ निसें दँयदसं ग्वसाः ग्वया वयाच्वंगु उगु मार्ट अन्तर्राष्ट्रिय स्तरय् ब्राण्डया रुपय् विकास जुयाः वनाच्वंगु दु ।
संस्कृति पर्यटन तथा नागरिक उड्डयन मन्त्रालय, नेपाल पर्यटन बोर्ड, नेपाल वायुसेवा निगम, लिसें पर्यटन क्षेत्रया थीथी संघ संस्थाया ग्वाहालि, समन्वय व सहकार्य पाटां उगु मार्ट ग्वसाः ग्वयेगु याना वयाच्वंगु खः ।

थ्व स्वयां न्ह्यः ग्वसाः ग्वःगु मार्ग निगूगु संस्करणया ताः लाःगुलिं नेपाःया पर्यटन क्षेत्रया प्रचार–प्रसार व प्रवद्र्धन न्हूगु आयाम तनेगु ज्या जूगु पाटा नेपाल च्याप्टरया अध्यक्ष सुनिल शाक्यं कनादीगु दु । वय्कलं धयादी, ‘हिमालय ट्राभल मार्ट क्रमशः ब्राण्डिङ जुयाः वनाच्वंगु दु, गुलिं नेपाःया पर्यटन क्षेत्रया हे छ्यं धस्वाकेगुया लिसें विश्व बजारय् नेपाःया सशक्त उपस्थिति क्यनेत ग्वाहालि जूगु दु ।’

अध्यक्ष शाक्यं हिमालयन ट्राभल मार्टं चीहाकःीु इलय् विश्व पर्यटन बजारय् बांलाःगु नां कमे याःगु व अप्वः पर्यटन स्रोत बजारं मार्टय ब्वति कायेगु चाहना अप्वया वनाच्वंगुलिं थुकिया लोकप्रियता अप्वया वनाच्वंगु खँ कनादिल । मार्ट देशया हे प्रमुख अन्तर्राष्ट्रिय ‘ट्राभर ट्रेड’ मेलाया रुपय् स्थापित जुया वनाच्वंगु व थुकिया झ्वलय् ग्वसाः ग्वइगु बी–टु–बी ज्याझ्वलं नेपाःया पर्यटक प्रवद्र्धनय् ग्वाहालि जुयाच्व्ंगु खँ पर्यटन बोर्डया प्रमुख कार्यकारी अधिकृत दीपकराज जोशी कनादीगु दु । मार्टया निक्वःगु संस्करणय् हिमालनय राष्ट्र बाहेक नं युएई, भियतनाम व कोरिया थेंज्याःगु राष्ट्रं विक्रेताया रुपय् ब्वति काःगु दु । मार्टया अप्वया वनाच्वंगु लोकप्रियताया कायम यानाः वइगु संस्करणयात थप सशक्त व प्रभावकारी यायेगु खँ धाःगु दु ।

मार्टयात सफल यायेगु निंतिं अन्तर्राष्ट्रिय सम्बन्धन व साझेदारी, विशिष्ठ व्यपक्तित्व वक्ता निर्धारण, प्रायोजक प्रवद्र्धन ब्वति काइपिं (न्याइपिं व मीपिं लिसें मेपिं पाहांपितं) ब्वनेगु व पत्राचार थेंज्याःगु आपालं धइथें यायेमाःगु ज्या तयारी पुरा जुइधुंकूगु खँ नेपाल च्याप्टरया प्रमुख कार्यकारी अधिकृत सुरेशसिंह बुडालं कनादीगु दु ।

थ्व स्वयां न्ह्यः सन् २०१७ सं ५३ गू देय्या २२५ विदेशी प्रतिनिधि व सन् २०१८ सं क्वचाःगु मार्टय् ३६देय्या १७० स्वयां अप्वः प्रतिनिधिपिंसं ब्वति काःगु खः । मार्टं देय्या पर्यटकीय अन्तव्य,, वस्तु लिसें सेवाया प्रचार प्रसार व बजारीकरण लगायत विश्वव्यापी पर्यटन, हस्पिट्यालिटी संघसंस्था, कम्पनी व हिमालनय पर्यटन क्षेत्र सम्बन्धित थीथी क्षेत्रय् आवद्ध व्यवसायी व व्यक्तित्वया व्यापार आदान प्रदान याइगु असिमित अवसर बीगु विश्वास कयातःगु दु ।

सम्बन्धित बुखँ

LEAVE YOUR COMMENTS