बजेट न्ह्यः शेयर बजाः कुहांवल

येँ – छुं ई न्ह्यवनिसें थहां वनाच्वंगु शेयर बजाः थ्व वाःया न्हापांगु न्हि आइतवाः धाःसा ११.९३ अंकं कुहां वंगु दु । संघीय सरकारपाखें बजेट न्ह्यब्वयेत्यंगु इलय् शेयर बजाः आकाझाकां कुहां वंगुयात लगानीकर्तातय्सं अर्थपूर्ण रुपं काःगु दु । आइतवाः कारोवार सुरु जूगु ५ मिनेट दुने सर्किट हे लगे जुइक थहां वःगु हिमालय डिस्ट्रिलरीया भाः तकं हाकनं कुहां वंगु खः ।

शुक्रवाः ६८.४२ प्रतिशत अन्तरिम लाभांश बीगु घोषणा याःगु हिमालयया भाः कारोवार सुरु जुइवं थहां वंसां बन्द जुइगु इलय् तकया दुने प्रति कित्ता १४३ तका कुहां वंगु खः ।मेखे आइतवाः जलविद्युत कम्पनीतय् भाः नं कुहां वंगु दु । दकलय् अप्वः कुहां वंगु जोशी हाइड्रोपावरय् ला सर्किट ब्रेक हे तयेमाःगु खः ।

आइतवाः नेप्से परिसुचक जक कुहां वंगु मखु, कारोवार रकम नं तसकं म्हो जूगु दु । वंगु वालय् औसत न्हि छगू अर्बया कारोवार जूगुलिं आइतवाः मुक्कं ६२ करोड ६२ लाख तकाया जक कारोवार जुल ।आइतवाः मुक्कं १६५ गू कम्पनीया कारोवार जूगुलिइ २७गू कम्पनीया जक भाः थहांवंगु खःसा ११९ गू कम्पनीया शेयर भाः कुहां वंगु खः ।