दाहालयात अन्तरिम आदेश मवल

येँ (नेपालभाषा टाइम्स)- प्रधानमन्त्री लिसें माओवादी केन्द्रया अध्यक्ष पुष्पकमल दाहालयात ज्वनाः अनुसन्धान यायेमाः धकाः अधिवक्ता ज्ञानेन्द्र आरण लगायतं दर्ता याःगु रिटय् सर्वोच्च अदालतं अन्तरिम आदेश बीत अस्वीकार याःगु दु । लिसें सर्वोच्च अदालतं झिंन्यान्हुया दुने लिसः बीत दाहालया नामय् कारण देखाउ आदेश नं जारी याःगु दु ।

संक्रमणकालीन न्यायलिसे स्वाःगु विषयय् रिट निवेदन दर्ता जूगु व थ्व मामिलाय् पटक–पटक व्याख्या जुइधुंकूगु धासें सर्वोच्च अदालतं पूर्ण सुनुवाइ लिपा जक मुद्दाया कानुनी न्ह्यसःया निरुपण जुइगु आदेश नं बिउगु दु ।

न्यायाधीश ईश्वरप्रसाद खतिवडाया एकल इजलासं जारी याःगु आदेशय् धयातःगु दु, ‘आः माग याःकथं अन्तरिम आदेश जारी जुइमाःगु तकया कारण खने मदुगुलिं अन्तरिम आदेश जारी यायेम्वाःल ।’ तर सर्वोच्चं निगुलिं मुद्दायात अग्राधिकार बीत धाःसा आदेश बिउगु दु ।

संक्रमणकालीन न्यायया बारे रिट निवेदन दर्ता जूगु धासें सर्वोच्च अदालतं थ्व सम्बन्धी विवाद निरुपण यायेबलय् संविधान, प्रचलित कानुन, संक्रमणकालीन न्यायया बारे सर्वोच्च अदालतं प्रतिपादन याःगु सिद्धान्त व अन्तर्राष्ट्रिय अभ्यासया आधारय् विवाद निरुपण जुइमाःगु खँ धाःगु दु ।

सर्वोच्च अदालतया आदेश लिपा प्रधानमन्त्री दाहालं प्रधानमन्त्री व माओवादी केन्द्रया अध्यक्षया हैसियतं बिस्कं बिस्कं लिखित लिसः पेश याये मालीगु जूगु दु । उकथं हे गृह, रक्षा, कानुन मन्त्रालय लिसें सत्यनिरुपण व बेपत्ता छानबिन आयोगं तकं लिखित लिसः पेश यायेधुंकाः सर्वोच्च अदालतं थ्व मुद्दायात नियमित प्रक्रिया कथं न्ह्यःने न्ह्याकी ।