स्वनिगः दुहांवःपिंत १४ न्हु होम क्वारेन्टाइनय् तयेत गृहया परिपत्र
येँ (नेपालभाषा टाइम्स) – गृह मन्त्रालयं पिने जिल्लां स्वनिगलय् दुहांवइपिंत झिंप्यन्हु तक होम क्वारन्टाइनय् तयेत धाःगु दु। मन्त्रालयं स्वनिगःया येँ, यल, ख्वप स्वंगुलिं जिल्लाया प्रमुख जिल्ला अधिकारी (सिडिओ)यात छगू परिपत्र छ्वसें स्वनिगलय् दुहां वःपिंत होम क्वारन्टाइनय् तयेत निर्देशन बिउगु खः ।
स्वनिगः पिहां दुहां वःपिं मनूत पिसिआर याकेगु निंतिं टेकुया शुक्रराज ट्रपिकल तथा सरुवा अस्पतालय् वइगु अप्वया वयेवं गृहं थ्व परिपत्र याःगु खः । छेँथुवाःतय्सं पिनें दुहां वःपिंत पिसिआर यानाः जक छेँय् दुहां वयेत धया हयाच्वंगुलिं पिने दुहां वःपिं न्हि द्वःछिं मयाक मनूत टेकुइ पिसिआर परीक्षण यायेत वनाच्वंगु दु। पिसिआर परीक्षण यायेत वइगु अप्वया वयेवं स्वास्थ्य मन्त्रालयं होम क्वारन्टाइनय् तयेगु व्यवस्था यानाबीत इनाप यासें गृह मन्त्रालयं पौ छ्वःगु खः ।
स्वास्थ्य मन्त्रालयं पिनें स्वनिगलय् वइपिं झिंप्यन्हु तक होम क्वारन्टाइनय् तयेत व लक्षण खने दुसा जक अस्पताल वयेगु व्यवस्था यायेत इनाप यासें गृहय् पौ छ्वःगु खः । थ्व हे इनाप कथं गृहं येँ, यल, ख्वपया प्रमुख जिल्ला अधिकारीतय्त होम क्वारन्टाइनय् तयेत निर्देशन पौ छ्वःगु खः ।
गृहं थ्वयां न्ह्यः स्वनिगलय् दुहां वयेत स्थानीय तहया स्वीकृत कयाः जक दुहां वयेदइगु खँ धाःगु खःसां थुकियात लागू यायेगु पहल तकं याःगु खनेमदु। थ्व हे कारणं स्वनिगलय् दुहां वयेगु अप्वया वःगु खः । आः दुहां वःपिंत नं परीक्षण याये मफयेवं बालं च्वनाच्वंगु छेँय् हे होम क्वारेन्टाइन तयेगु खँ हःगु खः । बालं च्वनाच्वंगु छेँय् हे होम क्वारेन्टाइन तःसां नं थुकिया निगरानी यायेफइगु अवस्था धाःसा मदुगु खँ स्थानीय जनप्रतिनिधितय्सं धयाच्वंगु दु। थज्याःगु अवस्थाय् स्वनिगलय् कोरोनाया खतरा झन अप्वया वयाच्वंगु स्वनिगःवासीतय्सं अनुभव याना हयाच्वंगु दु ।
LEAVE YOUR COMMENTS