मधेसया शहीद परिवार अझं पीडित

येँ – मधेस आन्दोलनय् ज्यान बियाः शहीद जूपिं आन्दोलनकारीतय् छेँजःपिंत अनया प्रदेश सरकारं बी धकाः न्हापा बचं बियातःगु छुं नं सुविधा उपलब्ध मयाःगु द्वपं सम्बद्ध शहीदया छेँजःपिंसं बिउगु दु । प्रत्येक शहीदया छम्ह छम्ह छेँजःपिंत सरकारी रोजगारी बीगु धकाः प्रदेश २ या सरकारं घोषणा याःगु खः । तर प्रदेश सरकार गठन जूगु निदँ दयेधुंकलं नं रोजगारी बीगु छुं हे पहल मयाःगु द्वपं शहीदया छेँजःपिंसं बिउगु दु ।

सरकारं शहीद परिवारयात सुविधाया नामय् आः तक छम्ह म्येय् व २५ द्वः तका दां जक बिउगु दु । वयां अप्वः छुं मबिउगु खँ उमिसं धाःगु दु । शहीद परिवारयात संघीय सरकारं बी धाःगु ध्यबा तकं गुलिखे छेँजःपिंसं काये मखंनिगु खँ नं धाःगु दु ।
मुख्यमन्त्रीपाखें शहीद परिवारयात रोजगारी बी धाःगुलिं शहीद परिवारपिं उकिया लागिं पियाच्वंगु दुसां थौंकन्हय् सरकारं उकिया लागिं छुं पहल मयाःगु खँ धाःगु दु ।

उखे प्रदेश सरकारं धाःसा शहीद परिवारया छेँजःपिं सरकारी ज्या यायेत दक्ष मजूगु कारणं उमित ल्वःगु बिस्कं हे रोजगारी सिर्जना याये मालाच्वंगु खँ धाःगु दु । सरकारं उमित दकलय् न्हापां दक्ष दयेकाः वयां लिपा रोजगारी चूलाकेगु कुतः यानाच्वंगु खँ नं धाःगु दु ।
अथे हे मेगु छगू सूत्रं धाःसा प्रदेशय् सरकारपाखें रोजगारी सिर्जन याये फइगु अधिकार हे आः तक प्राप्त मजूनिगु कारणं थःगु योजना कथं छम्ह हे कर्मचारी नियुक्त यायेगु अवस्था मदयाच्वंगुलिं थुखेपाखे ध्यान बी मखनाच्वंगु खँ धाःगु दु ।

सम्बन्धित बुखँ

LEAVE YOUR COMMENTS