डा. श्रेष्ठया सफू बेलायतय् पितब्वज्या

येँ –  साहित्यकारलिसें च्वमि डा. बालगोपाल श्रेष्ठया ‘झीगु सक्व देय् नेवाः समाजया संस्कृति व धर्मकर्मया मानवशास्त्र’ नांया सफू बेलायतया लन्दनय् पितब्वज्या जुल । पासा पुचः गुथिय युके व लन्दन विश्वविद्यालयया दक्षिण एशिया इन्ष्टिच्युटया मंकाः ग्वसालय् न्हापांगु युरोपव्यापी नेवाः संस्कृति व सम्पदा सम्मेलनया झ्वलय् डा. श्रेष्ठया उगु सफू पितब्वज्या याःगु खः ।

उगु सफूया पितब्वज्या बेलायतया अक्सफोर्ड विश्वविद्यालयया प्रा. डा. डेभिड गेल्नर व लन्दन विश्वविद्यालयया प्रा. डा. माइकल हटं मंकाःकथं पितब्वज्या यानादीगु खःसा गुथिया नायः संयुक्त श्रेष्ठं सफूया म्हसीका बियादीगु खः ।

सफूया अंगे्रजी संस्करण पिहां वःगु इलय् नं थम्हं हे पितब्वज्या यानागु लुमंकुसे अक्सफोर्ड विश्वविद्यालयया प्रा. डा. गेल्नरं नेपालभाषां पिदंगु सफू नं थःगु हे ल्हातं पितब्वज्या याये खंगुलिं लसता प्वंकादिल । प्रा. डा. हटं नेवाः भासं भाय् हिलाः पिहां वःगु सफूया बिस्कं महत्व दु धासें च्वमि व नेवाः भासं अनुवाद यानादीपिंत भिंतुना देछानादिल ।

सफूया च्वमि डा. श्रेष्ठं सक्व देय्या इतिहासनिसें मानवशास्त्रीय समाजया अध्ययन कःघानाः च्वयातःगु सफुतिइ नेवाः समाजया संस्कर, संस्कृति, गुथि, नखःचखःया विश्लेषण यानाः च्वयागु जानकारी बियादिल ।डा. श्रेष्ठं च्वयादीगु ‘द सेक्रेड टाउन अफ साँखु’यात नेवाः भासं भाय् हिला पिथंगु खःसा क्व (शंखरापुर) नगरपालिकाया आर्थिक ग्वाहालिं पिदंगु सफूया नेवाः भासं अनुवाद सिल्भिया राजोपाध्यायं व सम्पादन विमल ताम्राकारं यानादीगु खः ।

सम्बन्धित बुखँ

LEAVE YOUR COMMENTS