पूर्व मेयर शाक्यया योजना कार्यान्वयनय्

येँ(नेपालभाषा टाइम्स)÷येँ महानगर पालिकालिसें देय्न्यंकंया स्थानीय तहय् निर्वाचित जुया वःपिं जनप्रतिनिधिया कार्यकाल दछि पूवनेत्यंगु दु । थगुने बैशाख २० जूगु चुनाव लिपा स्थानीय तहय् न्हूगु निर्वाचित जनप्रतिनिधि वःगु खः ।

न्हूपिं निर्वाचित जनप्रतिनिधिपिंसं थःथःगु स्थानीय तहय् थःथःगु हे योजना दयेकाः उकियात कार्यान्वयनय् हइगु ख । तरसंघीय राजधानीलिसें देय्या हे ज्या थःगु महानगरपालिका येँय् वर्तमान महानगर प्रमुख बालेन्द्र शाह (बालेनं) निवर्तमान महानगर प्रमुख विद्यासुन्दर शाक्यं थःगु कार्यकालय् न्ह्यःने हयादीगु योजनायात हे कार्यान्वयन याना वयाच्वंगु खँ सीदुगु दु ।

येँ महानगरपालिकाया प्रमुखय् निर्वाचित जुयादीम्ह बालेनं पुलांम्ह प्रमुख शाक्यया कार्यकालय् क्वःछिनातःगु योजनायात हे धमाधम कार्यान्वयन यायेगु याना वयाच्वंगु खँ सीदुगु दु । वंगु छुं दिं न्ह्यः जक येँ महानगरपालिकां महानगरया थीथी क्षेत्रय् सीसीटिभी क्यामरा जडान व संचालनया निंतिं काठमाडौ उपत्यका प्रहरी खुगू करोड तका दां बीगु सम्झौता याःगु खः । यद्यपि उग सम्झौताय् ल्हाःचिं तयेगु ज्या आः वयाः जक जूगु खःसा पुलांम्ह प्रमुख शाक्यया हे कार्यकालय् क्वःछिनातःगु योजनाया निरन्तरता जक जूगु खँ सीदुगु दु ।

येँ महानगरपालिकां वंगु वालय् जक सीसीटिभी क्यामरा जडान व संचालन यायेत धासें येँ महानगर प्रमुख बालेन शाहया उपस्थितिइ सम्झौता पती ल्हाःचिं तःगु खः । पूर्व प्रमुख शाक्यया योजना कार्यान्वयन यायेगु झ्वलय् उगु सम्झौता पती महानगरया प्रमुख प्रशासकीय अधिकृत वसन्त अधिकारी व काठमाडौं उपत्यकार प्रहरी ज्याकूया प्रहरी अतिरिक्त महानिरीक्षक श्यामलाल ज्ञवालीं ल्हाःचिं तयादीगु खः ।

नगरया शान्ति सुरक्षा, अपराध नियन्त्रण, दुर्घटना, फोहर व्यवस्थापन, फुटपाथ अतिक्रमण, प्रदूषण, सार्वजनिक सम्पत्तिया उपयोगलिसें सहरी सुशासन व महानगरपालिकाया कार्य सम्पादनयात सूचना प्रविधि प्रणालीइ आवद्ध याकेगु ल्याखं महानगरं नेपाल प्रहरीयात उगु ग्वाहालि उपलब्ध याकूगु खः ।

येँ महानगरया पुलांम्ह मेयर शाक्यया पालय् २०७५ फागुन १५ गते सम्झौता यानाः महानगरं स्वंगू करोड तका प्रहरीयात बिउगु खः । उगु इलय् जूगु सम्झौताकथं जडान याःगु १६५ गः सीसीटिभी क्यामरामध्ये थौंकन्हय् १५८ गः चालु अवस्थाय् दुुसा सतक विस्तारया कारणं न्हय्गः प्रयोग विहीन अवस्थाय् दु ।

महानगर प्रमुख शाहं योजनागत ज्याय् विगतय् मेयर शाक्यया पालय् सम्झौता जुयाः थीथी कारणं पूवंके मफयाच्वंगु, आंशिक कार्यान्वयन जूगु योजना व नीतियात कार्यान्वयन यायेगु निंतिं प्राथमिकता बिया वयाच्वंगु महानगरपालिकाया छम्ह अधिकारीं धाःगु दु ।