टर्कीइ नेपाःमित अपहरित

येँ – रोजगारीया निंतिं दलालपाखें टर्की थ्यंपिं स्वम्ह नेपाःमि नागरिकत पाकिस्तानीतय्त फिरौती पुलाः वंगु शुक्रवाः नेपाः लिहां वःगु बुखँ ‘अनलाइन खबर डटकमं’ बिउगु दु । अपहरणय् लाःपिं मोरङ केरावारी–९ या किरण मगर, खोटाङया टीकाराम विश्वकर्मा व ताप्लेजुङया टीका लिम्बु खःसा मगर व विश्वकर्मा नेपाः लिहां वयेधुंकूगु दुसा लिम्बु टर्कीइ हे दनि ।

अपहरणय् लाःपिं स्वम्हेसितं छगू हे ट्वाइलेट न्हय्न्हु तक कुनातःगु खँ अपहरण लिपा उमिसं धाःगु दु । नेपाःया दलालपाखें भारतीय दलाल व अनं लिपा पाकिस्तानी दलालं उमित टर्की यंकूगु खः । टर्कीया होटलय् ज्या यायेबलय् ७० निसें ८० हजार तलब वइ धकाः उमित अन यंकूगु खः । तर अन थ्यंकाः सिल कि उमित लाः तसकं म्हो जक तलब बीगु जुयाच्वन । उमिसं तत्काल एजेन्टयात थःपिं लिहां वने धालं नं वास्ता मयाःगु खँ कंगु दु ।

थीथी कथं दलालं थःपिंत छम्हेस्यां मेम्ह दलाल क्यनाः ज्या बांलाः धकाः यंकीगु तर अन वनेबलय् धाःसां ज्या तसकं बांमलाःगु लाःगुलिं हानं मेम्ह हे एजेन्टं आकर्षक तलब सहित जागिर अफर यात । उगु एजेन्टं थःपिंत होटलया हे ज्याय् ५०० डलर वइ धकाः लोभ क्यंगुलिं अन हे वनागु खँ नं उमिसं कन ।

उमिसं कन, ‘एजेन्टं जिमित बिस्कं थाय् कायेमाः धाल । व, छगू क्वथा नं काल । अन थ्यने धुंकाः जिमित च्वनाच्वँ, कन्हय् होटलय् ज्या याः वनेमाः धाःगु खः । तर, जिमित जागिर नकेत मखु अपहरण यायेत जक उगु क्वथाय् तयातःगु खनिं ।’