गुरु इन्द्र महर्जन स्मृति ग्रन्थ विमोचन
येँ (नेपालभाषा टाइम्स)- किलागः त्वाःया गुरु इन्द्र महर्जनया लुमंतिइ पिदंगु स्मृति ग्रन्थया विमोचन लिसें उकिया बारे अन्तरसंवाद ज्याझ्वः जुल । शनिवाः राष्ट्रिय नाचघरय् छगू ज्याझ्वःया दथुइ थीथी पाहांपिनि ल्हातिं सपूmया मंकाः विमोचन जूगु खः । लिसें इन्द्र महर्जन सम्बन्धी वृत्तचित्र नं न्ह्यब्वयेगु ज्या जूगु खः ।
स्मृतिग्रन्थ प्रकाशन समूहया जुजुभाइ डंगोलया सभापतित्वय् जूगु उगु ज्याझ्वलय् स्मृतिग्रन्थ लिसें मदुम्ह गुरु इन्द्र महर्जनया बारे थीथी वक्तापिंसं न्ववानादीगु खः । ज्याझ्वः मदुम्ह गुरु महर्जनया तःधीम्ह काय नरेन्द्र महर्जनं लसकुस यासें न्ह्याःगु खः ।
ज्याझ्वलय् प्रतिनिधिसभाया सांसद विराजभक्त श्रेष्ठ, बागमती प्रदेशया सांसदपिं हरिप्रभा खड्गी श्रेष्ठ, शैलेन्द्र वज्राचार्य, पुलांम्ह मन्त्री जीवनराम श्रेष्ठ, येँ मनपाया पुलांम्ह मेयर विद्यासुन्दर शाक्य लिसें विज्ञपिं प्रा.डा. त्रिरत्न मानन्धर, डा. चुन्दा वज्राचार्य, डा. चन्द्रमान वज्राचार्य, डा. पञ्च महर्जन, भोलाकुमार श्रेष्ठ, प्रकाश दर्नाल, राजभाइ जकःमि आदिपिंसं थःपिनि बिचाः तसें मदुम्ह इन्द्र महर्जन थःहे छम्ह सम्पदा जुइधुंकूगु व वय्कःया लुमंतिइ आः हुलाक टिकट पिकायेगु लागिं नं पहल यायेमाःगु खँ कनादीगु खः । सफूयात कयाः पत्रकारपिं पुष्कर माथेमा व सुरेश किरणपिंसं समीक्षा यानादीगु खः ।
ज्याझ्वःया सभापति जुजुभाइ डंगोलं आः याकनं हे ‘गुरु इन्द्र महर्जन प्रतिष्ठान’ नीस्वनेगु ग्वसाः दुगु जानकारी नं बियादिल ।
LEAVE YOUR COMMENTS