सामुदायिक स्वास्थ्य सेवा परिषद्या न्हूगु भवनया शिलान्यास

येँ- थनया येँ महानगरपालिका वडा नं. १५ स्थित डल्लु आवास लागाय् च्वंगु सामुदायिक स्वास्थ्य सेवा परिषद्या न्हूगु भवनया आः नकितिनि शिलान्यास यायेगु ज्या जुल । स्वयम्भू डल्लु लागाया स्थानीयवासीतय्त स्वास्थ्य सेवाय् सहज रुपं पहुँच बीगु उद्देश्यं थौं स्वयां करिब प्यंगू दशक न्ह्यः सामुदायिक स्वास्थ्य सेवा परिषद् संचालन जूगु खः । आः परिषद्या न्हूगु भवन ‘ब्लक बी’या रुपय् विस्तार यायेत्यंगु खः ।

येँ महानगरपालिकाया प्रमुख विद्यासुन्दर शाक्यं छुं दिं न्ह्यः जक न्हूगु भवनया शिलान्यास यानादीगु खः । उगु भवन येँ महानगरपालिकाया छगू करोड ७० गू लाख तका लागतय् निर्माण जुइत्यंगु खःसा तत्कालया निंतिं भवन निर्माण यायेत ६४ गू लाख तका बजेट विनियोजन याःगु दु ।

भवन शिलान्यास यानादिसें येँ मनपा प्रमुख शाक्यं उगु स्वास्थ्य संस्थां स्थानीयवासीतय्त बिया वयाच्वंगु स्वास्थ्य सेवायात कयाः प्रशंसा योग्य जूगु विचाः तयादीगु खः ।

सामुदायिक स्वास्थ्य विस्तार यायेत भवनया नक्साय् प्यंगू तल्ला धकाः न्ह्यथनातःकथं भवन निर्माणया निंतिं येँ मनपां बजेट उपलब्ध याकेगु बचं बियादीगु खः ।

ज्याझ्वलय् येँ मनपा १५ वडाअध्यक्ष ईश्वरमान डंगोलं आर्थिकस्थिति कमजोर जूपिं स्थानीय जनतायात दंक, सुलभ व गुणस्तरीय सेवा बीत स्थापना जूगु संस्थां बांलाःगु सेवा बियाच्वंगु धयादिल । लिसें वय्कलं सामुदायिक सेवा भवनयात आः छुं दँ लिपा ५० श्यया सामुदायिक अस्पतालया रुपय् विकास यायेगु जुइ धयादिल ।

थौं स्वयां ३७ दँ ँन्ह्यः समाजसेवी नापं परिषदया संस्थापक नायः रत्ननारायण ‘न्हूजवाः’ साय्मिया सक्रियताय् स्थानीयवासीतय्त स्वास्थ्य सेवा बीगु उद्देश्यं उगु संस्था स्थापना जूगु खः ।