त्याःगु दुने नं बुना वनाच्वंम्ह प्रम ओली

नेपाःया राजनीतिइ चतुरम्ह खेलाडी अले न्ह्यागु हालतय् नं थः हे त्याकेफुम्ह खेलाडी खः प्रधानमन्त्री केपी शर्मा ओली । लिपांगु इलय् एमाले पार्टीयात नं एकता यानाः प्रधानमन्त्री नं थः हे जुयादीगुयात स्वल धाःसा अवश्य नं ओली थुगुसी राजनीतिइ त्याकादीगु दु धायेछिं । थःगु हे पार्टी दुने माधव नेपाल–झलनाथ खनाल गुटपाखें असहयोग याइगु अवस्था ब्वलनाच्वंगु इलय् नं आकाझाकां विश्वासया मत कायेगु धकाः संसदया विशेष अधिवेशन सःताः थः छम्ह राजनीतिक खेलाडीया रुपय् प्रस्तुत यायेगु ज्या यानादीगु दु । उगु इलय् संसदय् बहुमत मदुगु अवस्था जूसां नं मेमेगु दलत जानाः बहुमत दयेके मफयेकेगु नितिं ओलीं दुनें दुनें तःधंगु खेल म्हितादीगु दु । वय्कःयात भारतपाखें नं तःधंगु सहयोग दुगु जुयाच्वन धयागु खँयात सुनां सुचुकेमाःगु अवस्था मखये धुंकल । भाजपाया नेतातय्सं खुलेआम हे भारतया समर्थन धइगु ओलीयात खः धकाः थःपिनिगु मत तयादीगु खँ नं सार्वजनिक जुइधुंकूगु दु ।

वंगु वैशाख २७ गते प्रतिनिधिसभा संसदय् विश्वासया मत काये मफयेवं प्रधानमन्त्री केपी शर्मा ओली पदमुक्त जुयादीगु खःसा अबले प्रधानमन्त्री बुत धकाः मनूतय्सं तायेकूगु खः । तर वास्तवय् व ला ओली थः त्याकेगु नितिं छक्वः बुकाः क्यंगु अर्थात बूसां त्याइगु लँपुइ वंगु खः । अबलय् थःके बहुमत मदुसां मेमेगु दलत जानाः नं बहुमत हये मफइगु सिउम्ह ओलीं विश्वासया मत कायेगु धकाः तमाशा जक क्यंगु खः । थ्व तमाशा लिपा राष्ट्रपति विद्यादेवी भण्डारीं तुरुन्त हे दकलय् तःधंगु दलया हैसियतं ओलीयात हे प्रधानमन्त्री नियुक्त यानाबिल । अल्पमतया सरकार दयेकूगु अर्थात प्रधामन्त्री नियुक्त जूगु लच्छिया दुने विश्वासया मत कायेमाः । नेपाःया संविधानया धारा ७६ (३) कथं प्रधानमन्त्रीइ ओलीयात राष्ट्रपतिं चान्हय् हे नियुक्ति यानाः सपथ ग्रहण याकादीगु खः । थ्व धइगु हथासं हथासं प्रधानमन्त्री नियुक्ति यायेगु व सपथ ग्रहण याकेगु ज्या जूगु खनेदु ।

राजनीतिक घटनाक्रमय् थुगु अवस्था तक एमालेया अध्यक्ष तकं जुयादीम्ह प्रधानमन्त्री केपी शर्मा ओली त्यानाच्वंगु हे दु । राजनीतिया छम्ह प्रमुख खेलाडी ओलीयात थः पराजित जूगु क्यनाः नं विजय चूलाकूम्ह धकाः मनूतय्सं विश्लेषण याना हःगु दु । राजनीतिइ धइगु हे बुकाः नं त्याकेगु, अले अले त्याःसां बुना वनीगु कासा खः । संसदय् बहुमत वइमखुगु अवस्था जुइक जुइकं नं विश्वासया मत कायेत मतदान याकाः थः बूसां प्रधानमन्त्री पद त्याकादीम्ह ओली आः धाःसा त्याःसां नं बुना वनाच्वंगु खनेदु ।

प्रधानमन्त्री केपी शर्मा ओलीं बैशाख ३१ गते सपथ नयादीगुयात कयाः प्यखेरं आलोचना यानाहःगु दु । प्रधानमन्त्रीं नेपाःया संविधानयात हाचां गायेगु ज्या यात, राष्ट्रपतियात तकं निर्देशन बिइगु ज्या यात धकाः हरेक नाकगरिकतय्सं धायेगु यानाहःगु दु । प्रधानमन्त्रीं शपथया झ्वलय् ‘प्रतिज्ञा याये’ धइगु खँग्वःयात मधासे ‘व म्वाः’ धयादीगुलिं राष्ट्रपति थेंज्याःगु संस्थाया हे मानमर्दन जूगु जिकिर याःगु दु । गुगु कथं प्रधानमन्त्री ओलीं सपथ ग्रहणया इलय् हे राष्ट्रपतियात निर्देशन बिइगु ज्या यानादिल अले राष्ट्रपति न्हिलादिल थ्व भिडियो सार्वजनिक जुइवं हे राजनीतिक नेता कार्यकर्तातय्सं जक मखु आम नागरिकतय्सं तकं तसकं आलोचना यानाहःगु खः । प्रधानमन्त्री सपथ ग्रहणया इलय् हे छगू कथं गल्ती यानादिल । राजनीतिइ त्याःगु दथुइ छगू कथंया बुना वंगुया थ्व छगू मेगु संकेत खः धकाः धाःसां छुं पाइमखु ।

बहुमत कायेगु नितिं एमालेया माधव–खनाल पक्षं मत बिउसां नं महन्थ ठाकुर पक्षयापिं सांसदतय्गु नं मत माःगु अवस्था दु । तर ठाकुर पक्षं थःपिनिगु माग पुरा मजुइकं समर्थन याये फइमखु धकाः धाःगु नापं सरकारय् नं वये फइमखु धकाः धाःगु धयागु प्रधानमन्त्री ओलीया निंतिं छगू हाथ्या जुया बिउगु दु ।

प्रधानमन्त्री केपी शर्मा ओलीं वैशाख ३१ गते सपथ नयादीगु नेपाःया संविधान व कानुनया अःखः खः धकाः उकियात बदरया माग यानाः प्यंगू रित सर्वोच्च अदालतय् दर्ता यायेगु ज्या कानुन व्यवसायीतय्सं यायेधुंकूगु दु । वरिष्ठ अधिवक्तापिंसं प्रधानमन्त्रीं ओलीं सपथ ग्रहण यानादीगु इलय् राष्ट्रपतिं बाचन यानादीगुसिबें ब्यागलं कथं वाचन यानादीगुलिं उकियात बदर यायेमाःगु माग यासें हाकनं सपथ कायेत आदेशया माग यानादीगु दु । व सपथयात हे बदर व गैर सांसदतय्त तकं मन्त्री पद बिउगुलिं इमित नं बदरया माग यानाः सर्वोच्च अदालतय्त रित दायर जूगु खः ।
गैरसांसद मन्त्रीपिं रामबहादुर थापा बादल, टोपबहादुर रायमाझी, लेखराज भट्ट व गौरीशंकर चौधरी, मणिचन्द्र थापा व दावा लामाया नियुक्ति व शपथ बदर यायेत माग याःगु खः । सांसद मखुपिं खानेपानी मन्त्री थापा व युवा तथा खेलकुद मन्त्री लामां न्हापांखुसि २०७७ पुष १० गते मन्त्री पदया सपथ नयादीगु खःसा अथे हे नेकपा माओवादी केन्द्र त्वःता एमालेय् वनाः सांसद पद गुमे याःपिं टोपबहादुर रायमाझी, लेखराज भट्ट, प्रभु साह व गौरीशंकर चौधरीं चैत २७ गते मन्त्री पदया सपथ नयादीगु खः, अथेहे रामबहादुर थापां २०६८ वैशाख ५ गते शपथ नयादीगु खः । गैरसांसद मन्त्री जूगु अवस्थाय् खुलाया दुने संसद जुइमाःगु व संसद सदस्य मजूगु अवस्थाय् प्रधानिधिसभाया उगु कार्यकाल दुने मन्त्री जुइ मदइगु संवैधानिक व्यवस्था दुगुलिं उमिगु नियुक्ति खारेज जुइमा नापं सपथ बदर जुइमाः धकाः माग याःगु दु । रितया बारे याकनं हे सर्वोच्च अदालतं थःगु फैसला न्यंकी ।

प्रधानमन्त्री केपी शर्मा ओलीं कोभिड–१९ या संक्रमण थज्याःगु अवस्थाय् तक वइ धकाः थःम्हं आँकलन तकं मयानागु धकाः स्वीकार यानादीगु दु । व धइगु हाकनं प्रधानमन्त्री पदया सपथ ग्रहण यानादी न्ह्यः तक प्रधानमन्त्री ओलीं कोरोनायात कयाः गम्भीर रुपं कयामदीगु जुयाच्वन धकाः स्पष्ट जू । उकिं हे वय्कः राजनीतिक खेल म्हितेगुलिइ यक्व क्रियाशिल जुयादिल । आः वयाः वय्कलं तःधंगु समस्या कोरोना जुयावल धकाः थुइकादिल ।

लिपांगु इलय् वयाः प्रधानमन्त्री केपी शर्मा ओलीं संसदय् हाकनं बहुमत क्यने मानीगु अवस्था दु । बहुमत कायेगु नितिं एमालेया माधव–खनाल पक्षं मत बिउसां नं महन्थ ठाकुर पक्षयापिं सांसदतय्गु नं मत माःगु अवस्था दु । तर ठाकुर पक्षं थःपिनिगु माग पुरा मजुइकं समर्थन याये फइमखु धकाः धाःगु नापं सरकारय् नं वये फइमखु धकाः धाःगु धयागु प्रधानमन्त्री ओलीया निंतिं छगू हाथ्या जुया बिउगु दु ।

पार्टी दुनेया हे खँ ल्हायेगु खःसा न्हापा माओवादी केन्द्रलिसे एकता जुयाः नेपाल कम्युनिष्ट पार्टी (नेकपा) निर्माण याये न्ह्यःया अवस्थाय् एमाले वनेमाः धकाः माधव–खनाल पक्षं अडान कयाच्वंगु दुसा अन्ततः प्रधानमन्त्री नापं पार्टीया अध्यक्ष ओली उगु अवस्थाय् वनेत बाध्य जूगु दु । थ्व धइगु ओली पार्टी पराजित जुयावंगु खः धायेमाः । आः वया माओवादी केन्द्र त्वःताः वःपिन्त ब्यवस्थापन यायेगु सवाल नं ओलीयात हाथ्या जुया वःगु दु ।

थ्व फुक्क कथंया घटनायात स्वल धाःसा ओली राजनीतिइ त्यानाः नं आः हाकनं दुनें दुनें पराजित जुया वनाच्वंगु खनेदु । अथे दुने दुने बुना वनाच्वंगु अवस्था जूसां नं हाकनं त्याकेगु निंतिं संसदय् बहुमत हये मफइगु अवस्था जुल धाःसा चुनाव घोषणा याना थःगु हे नेतृत्वया सरकारं चुनाव यायेगु अले आःया संसद ज्याख्यलय् वःगु मदु धकाः विघटन यानागु पाय्छि खः धकाः थप पुष्टि यायेगु कथं संसद हाकनं विघटन यानाः चुनावय् वनीगु संभावना नं उलि हे दु । राजनीतिक खेलाडी ओली आः बुना वनाच्वंगु खनेदुसां छुं ई लिपा हाकनं मेगु कथंया पलाः ल्ह्वनाः थः त्याकेगु खेल म्हितीमखु धकाः धायेफइमखु ।

सम्बन्धित बुखँ

LEAVE YOUR COMMENTS