ने. सं. ११४६ बछलागा तृतीया -

‘मुख्यमन्त्री पौडेल अल्पमतय्’

येँ- बागमति प्रदेशया भौतिक पूर्वाधार विकास मन्त्रीइ रामेश्वर फुयालयात नियुक्त यायेधुंकाः मुख्यमन्त्री डोरमणि पौडेल व नेकपाया प्रदेश सांसदत व नेतातय् दथुइ कचवं झन् तच्वया वःगु दु । थ्व कचवंया कारणं पौडेल अल्पमतय् हे लायेधुंकूगु दुसा वय्कःविरुद्ध अविश्वासया प्रस्ताव वयेफुगु तक चर्चा जुयाच्वंगु दु । गुलिखे सांसदतय्सं वय्कः विरुद्ध अविश्वास प्रस्ताव तयेगु निंतिं हस्ताक्षर संकलन तकं न्ह्यायेधुंकूगु खँ धायेगु यानाच्वंगु दु ।

नेकपाया बागमति प्रदेश इन्चार्ज अष्टलक्ष्मी शाक्यं नं मुख्यमन्त्री पौडेल अल्पमतय् लायेधुंकूगु खँ स्वीकार यानादीगु दु । इन्चार्ज शाक्यं मुख्यमन्त्री खनाः सांसदत सकलें तंचायाच्वंगु व आः वय्कः अल्पमतय् हे दुगु खँ धयादीगु दु । तर वय्कलं अविश्वासया प्रस्ताव हे तयेगु बारे धाःसा थःत छुं जानकारी मदुगु खँ धयादीगु दु ।

मुख्यमन्त्री पौडेल खनाः तंचायाच्वंपिं मध्ये छम्ह प्रदेश इन्चार्ज शाक्य स्वयम नं खः । विशेषतः पौडेलं प्रदेश कमिटीया खँ मन्यँसे केन्द्रीय नेतातय् आड–भर कयाः ज्या यानाच्वंगु खँय् वय्कःया विमति जुयाच्वंगु दु । प्रदेशया राजधानी तयेगु खँ निसें आः मन्त्री नियुक्त यायेगु खँय् तकं प्रदेश कमिटीया खँ मन्यंगु द्वपं इन्चार्ज शाक्यया दु । प्रदेश कमिटीपाखें फुयालयात आः तुरुन्त हे मन्त्री नियुक्त मयायेत धाःगु खः । तर मुख्यमन्त्री पौडेलं प्रदेश कमिटीयात वास्ता मयासें पार्टीया शीर्ष नेतातलिसे खँ ल्हानाः फुयालया शपथ ग्रहण याकूगु खः ।

फुयालयात मन्त्री दयेकीगु खँ इन्चार्ज जक मखु सहइन्चार्ज, सचिवया लिसें प्रदेशया मन्त्रीतय्सं तकं मसिउगु जुयाच्वन । थुकिं यानाः मन्त्री नियुक्ती यायेधुंकाः नं फुयालया शपथग्रहण निन्हुतक लिज्याःगु खः । मुख्यमन्त्री पौडेलं शीर्ष नेतातय्थाय्् हारगुहार यानाः शपथ ग्रहण याकूगुलिं प्रदेश कमिटीया नेतात, सांसदत मुख्यमन्त्री खनाः तंम्वयाच्वंगु खः । थ्वयां न्ह्यव नं प्रदेशया राजधानी हेटौंडा तयेगु खँय् यक्व सांसदतय् विमति दुगु खःसां पौडेलं सांसदतय् भावनायात बेवास्ता यासें शीर्ष नेतातय्थाय् लबिङ यानाः ह्वीप हे जारी याकाः हेटौंडायात राजधानी दयेकूगु
खः । थुकिं नं यक्व सांसदत पौडेल खनाः असन्तुष्ट जुयाच्वंगु खः ।

मुख्यमन्त्री पौडेलं थः यःपिं सांसदतय्त ज्वना जुयाः मेपिं सांसदतय्त बेवास्ता यानाच्वंगु द्वपं नं सांसदतय् दु । आर्थिक दँ २०७६–७७या बजेट विनि–योजनय् तकं वय्कलं थथे यानाः गुलिखे जिल्लाय् गाक्क बजेट तक विनियोजन यानामबिउगु खः । थुकिं यानाः उबलय् बजेट तकं पास मजुइगु अवस्था जूगु खः । इन्चार्ज शाक्यं उबलय् हे बजेट पास यायेत तकः ह्वीप जारी यायेमाःगु अवस्था वयेधुंकूगु खँ धयादीगु दु ।

इन्चार्ज शाक्यं बागमति प्रदेश सरकारय् केन्द्रया हस्तक्षेप तच्वया च्वंगु व उकिं यानाः मुख्यमन्त्री प्रदेश कमिटीयात उपेक्षा यानाच्वंगु खँ नं धयादीगु दु ।