लखिमपुर हिंसा लिपा अर्धसैनिक बल तैनाथ, प्रियंका गान्धी व अखिलेश यादव ज्वन
एजेन्सी÷ भारतया उत्तर प्रदेशया लखिमपुर जिल्लाय् निम्ह मन्त्रीतय्सं याःगु भ्रमण लिपा जूगु हिंसात्मक घटना लिपा अन अर्धसैनिक बल छ्वःगु दु । केन्द्रीय गृह मन्त्रालयं लखिमपुरय् शान्ति व्यवस्था कायम यायेत धकाः अर्धसैनिक बलया प्यंगू कम्पनीं उखे छ्वःगु खः ।
लखिमपुर जिल्लाय् आइतवाः केन्द्रीय गृह राज्यमन्त्री अजय मिश्र टेनी वःगु इलय् किसानतय्सं याःगु विरोध प्रदर्शनया झ्वलय् हिंसात्मक घटना जूगु खः । थ्व घटनाय् लानाः प्यम्ह किसान व प्यम्ह भाजपा कार्यकर्ता यानाः च्याम्ह मनू सीगु खः । भारतीय सञ्चार माध्यमया कथं किसानतय्सं यानाच्वंगु कृषि कानूनया विरोधयात राज्यमन्त्री मिश्रं विरोध यानाच्वंगुलिं किसानत मिश्र खनाः तम्वयाच्वंगु खः । उकिं मिश्र वयेवं विरोध यानाच्वंपिं किसानतय्त नेतात च्वनावःगु निगः जीपं क्यःगु खः । थुकी लानाः छम्ह किसान घटनास्थलय् व निम्ह वासः याकुयाकुं सीगु खः ।
थ्व घटना लिपा तंचाःपिं आन्दोलनकारीतय्सं जिपय् मि तयाबिउगु खः । जिपय् मन्त्री अजय मिश्राया काय नं दुगु खँ किसानतय्सं धाःगु दु । मन्त्री मिश्रं धाःसा थ्व द्वपं अस्वीकार याःगु दु । मन्त्री मिश्रां भाजपाया स्वम्ह कायकर्ता सीगु व जिप चालक सीगु धाःगु दु ।
थ्व घटना लिपा लखिमपुर वनेत्यंम्ह कांग्रेसया नेतृ प्रियंका गान्धी व उत्तर प्रदेशया पुलांम्ह मुख्यमन्त्री अखिलेश यादवयात ज्वनाः हिरासतय् तःगु दु । लखिमपुर वनेत्यंम्ह नेतृ गान्धीयात पनेत प्रहरीं गान्धी च्वनावःगु गाडीयात पनेवं छझाः झडप जूगु खःसा थ्व हे इलय् गान्धी गाडीं पिहां वयाः न्यासि वनाः मेगु गाडीं च्वंवंगु खः । थ्व लिपा प्रहरीं गान्धीयात ज्वनाः सितापुर थानाय् यंकूगु खः ।
मेखे पुलांम्ह मुख्यमन्त्री यादवयात नं प्रहरीं लखिमपुर वने मबिइवं वय्कः धर्नाय् च्वनादीगु खः । धर्नाय् च्वंम्ह यादवयात प्रहरीं ज्वंगु खः ।
LEAVE YOUR COMMENTS