रोक्का जग्गा फुक्का यायेत माग

येँ (नेपालभाषा टाइम्स)- स्वनिगः दुनेया थीथी नगरपालिकाया मेयरपिं च्वनाः गठन यानातःगु मेयर फोरमपाखें म्हिगः उपप्रधान लिसें शहरी विकास मन्त्री प्रकाशमान सिंहयात नापलानाः स्वनिगःया शहरी व्यवस्थापनय् वयाच्वंगु थीथी समस्यायात कयाः खँल्हाबल्हा यात ।

उपप्रम सिंहयात फोरमपाखें स्वनिगलय् स्मार्ट सिटी दयेकेगु नितिं धकाः रोक्का यानातःगु जग्गा याकनं फुकुवा याना बी माल धकाः इनाप याःगु खः । राज्यं थथे ताःई तक जग्गा रोके यानातःगुलिं जनतायात समस्या जूगु धासें याकनं फुकुवा यायेत माग याःगु खः । लिसलय् मन्त्री सिंहं स्मार्ट सिटीया नितिं जग्गा रोक्का जूगुलिं जग्गाधनीं उपयोग याये मखनाच्वंगु गुनासो याकनं समाधान यायेत मन्त्रालयं ज्या न्ह्याकूगु जानकारी बियादीगु खः ।

शहरी विकास मन्त्रालयया उपत्यका शहरी विकास प्राधिकरणं यक्व हे स्मार्ट सिटी दयेकेगु धकाः स्वनिगःया थीथी लागाय् लाखौं रोपनीया कित्ताकाट व न्याये–मी रोके यानातःगु खः । थुकिं यानाः जग्गा मी माःपिं वा जग्गा बैंकय् तयाः वासः यायेगु, मस्तय्त ब्वंकेगु आदि ज्या यायेमाःपिं स्थानीय मनूतय्त मर्का जुयाच्वंगु खः ।

अथे हे उगु मुँज्याय् फोरमया नायः लिसें यल उपमहानगरपालिकाया मेयर चिरिबाबु महर्जनं स्वनिगःया थीथी सतकय् तयातःगु सार्वजनिक विद्युतया ध्यबा नं स्थानीय निकायं पुलेमाः धकाः विद्युत प्राधिकरणं कडाइ यानाहःगु खँय् नं थःपिनि असन्तुष्टि प्वंकादीगु खः । स्वनिगः दुनेया सार्वजनिक सतक, सम्पदास्थल, पर्यटकीय लागा आदि थासय् च्याकातःगु मतया ध्यबा स्थानीय तहतय्सं व्यहोरे यानाच्वंगु खःसां आः वयाः राजमार्ग, चक्रपथय् च्याकीगु मतया ध्यबा समेत स्थानीय तहं पुलेमाः धयाहःगुलिं आपत्ति प्वंकादीगु खः । विद्युत प्राधिकरणं ध्यबा मपू धकाः उद्योगतय्गु मत चाना बिउ थें सतकय् च्याकीगु मतया लाइन नं चानाबिल धाःसा आन्दोलन यायेगु जुइ धकाः ख्याच्वः नं बियादिल ।

बालेन साहपाखें बहिष्कार
उपप्रधान लिसें शहरी विकास मन्त्री नापलाः वनेगु मेयर फोरमया उगु ज्याझ्वःयात फोरमया पुलांम्ह नायः लिसें येँ मनपाया मेयर बालेन साहं धाःसा बहिष्कार यानादीगु दु । थौं उपप्रम नापलाः वनेगु धकाः वय्कःयात खबर याःगु खःसां वय्कः उकी सहभागी जुयामदीगु जक मखु, सुं प्रतिनिधि समेत छ्वया मदीगु खँ फोरम सूत्रं धाःगु दु । लुमंकेबहः जू, छुं ई न्ह्यः तिनि भुइजःसिया छगू रिसोर्टय् जूगु मेयर फोरमया बैठकय् वय्कलं निजी कम्पनीया ध्यबा नयाः स्वनिगःया मेयरतय्सं निजीतय् हितय् न्ववाःगु धकाः आलोचना यासें बैठक हे त्वःताः पिहां वनादीगु खः । उल्सांनिसें वय्कलं फोरमया छुं नं बैठक वा ज्याझ्वलय् ब्वति कयामदी ।