पाँचखालय् राजधानी तयेत प्रस्ताव

येँ- प्रदेश नं. ३ या राजधानी हेटौंडां सारे यायेगु लागिं न्हूगु थाय् मालेगु शुरु जूगु दु । आः दयेकीगु राजधानी न्हापा हे वस्ती दयेधुंकूगु थासय् मयासे तकूगु थाय् दुगु तर वस्ती मदुगु लागाय् राजधानी बसे यायेगु तयारी जुयाच्वंगु खँ सीदुगु दु ।

राजधानीया लागिं न्हूगु थाय्या रुपय् काभ्रेया पाँचखाल लागा गथे जुइ धकाः ३ नम्बर प्रदेशया एमाले सांसद डा. अजयक्रान्ति शाक्यं प्रस्ताव समेत न्ह्यःने तयादीगु दु । थ्व थासय् राजधानी तःसा गथे जुइ धकाः वय्कलं सामाजिक सञ्जाल मार्फत बिचाः मुंकेगु ज्या समेत शुरु यानादीगु दु ।

राजधानीया लागिं पाँचखालं उखे व दोलालघाटं थुखेया तकूगु लागा वय्कलं प्रस्तावित यानादीगु खः । वय्कःया कथं थ्व लागाय् राजधानी तल धाःसा अन छगू न्हूगु हे नगर निर्माण जुइगु व उगु नगरयात ३०० दँयात माःगु पूर्वाधार अन उपलब्ध जुइगु सम्भावना दु । थ्व बाहेक पन्ति, भोत व थिमि नं राजधानी कथं चर्चाय् दु ।