काठमाडौं नेवाः किन्डरगार्टेनया ग्राजुएसन

येँ – काठमाडौं नेवाः किन्डरगार्टेनं स्कूलं युकेजी क्वचायेकूपिं मस्तय्त ग्राजुएसन सर्टिफिकेट लःल्हाःगु दु । शनिवाः किन्डरगार्टेनया भ्रातृ स्कुल काठमाडौं मोडल स्कूलय् जूगु ज्याझ्वलय् मूपाहां ईलोहं प्रकाशनया व्यवस्थापक व सम्पादक दर्शनवीर शाक्यं ग्राजुएट याःपिं ३२ म्ह मस्तय्त सर्टिफिकेट लःल्हानादीगु खःसा संस्थापक रविन्द्र महर्जनं तस्बिर लःल्हानादीगु खः । ग्राजुएसन ज्याझ्वलय् स्कुलया मस्तय्सं थीथी हुलाप्याखं, म्येँ नं न्ह्यब्वःगु खः ।

ज्याझ्वलय् न्ववानादिसें स्कूलया निर्देशक राजेन्द्र महर्जनं नेवाः भासं ब्वनाः मस्त कमजोर जुइमखु, झन प्रतिभाशाली जूगु अनुभव थःपिंके दुगु खँ कनादिल । लिसें वय्कलं नेवाः भासं ब्वनाः ग्राजुएट जूपिं मस्तय् हामाजुपिंसं मेगु स्कुलय् तयेबलय् नं छेँय् हे नेवाः भाय् ल्हानाच्वनीगु विश्वास प्वंकादिल ।

अथेहे वय्कलं थःपिंसं हे संचालन याना वयाच्वंगु काठमाडौं मोडेल स्कुलय् नं नेपालभाषा विषय तयेगु बचं नं बियादिल । ज्याझ्वलय् निर्देशक महर्जनं नेपालभाषा टाइम्स न्हिपौयात ‘नेपालभाषा जागरण हना’ पाखें हनादीगु खः ।