ने. सं. ११४४ चौलाथ्व अष्टमी -

लानिपुखुली ग्रन्थकुट देगः निश्चित

प्राधिकरणलिसे ठेकेदार कम्पनीया हस्ताक्षर

येँ – लानिपुखुली च्वंगु बालगोपालेश्वर देगः आः शिखर (ग्रन्थकुट) शैलीं दयेकीगु निश्चित जूगु दु । शिखर शैलीं देगः दयेकेगु निंतिं राष्ट्रिय पुनर्निर्माण प्राधिकरण व ठेकेदार कम्पनी सीए-तुलसी कन्ट्रक्सक्शन जेभी दथुइ म्हिगः छगू सम्झौताय् विधिवत् हस्ताक्षर जूगु दु । देगः दयेकेगु सम्झौता जुइवं प्राधिकरणं पुनर्निर्माणया ज्यां गति काइगु विश्वास प्वंकूगु दु ।

बालगोपालेश्वर देगः, देगः तक थ्यंकेगु ताँ व पुखूया जःखः क्यब दयेकेगु जिम्मा जेभीयात बिउगु खः । सम्झौतापती प्राधिकरणपाखें सहसचिव लिसें सम्पदा संरक्षण, सार्वजनिक भवन तथा पूर्वाधार महाशाखा प्रमुख शिवहरि शर्मा व ठेकेदार कम्पनीपाखें शान्तकुमार श्रेष्ठं हस्ताक्षर याःगु खः । देगः दयेकेगु निंतिं १४ करोड २७ हजार ५५७ तका खर्च जुइगु खँ धाःगु दु ।

हस्ताक्षर ज्याझ्वलय् न्ववासें प्राधिकरणया कार्यकारी अधिकृत सुशील ज्ञवालीं देगः पुनर्निर्माणया निंतिं सम्झौता जूगु सुखद् पक्ष खः धयादिल । वय्कलं उगु देगः प्रताप मल्लकालीन शैलीं दयेकेगु खँ कनादीगु खः । ठेकेदार कम्पनीया शान्तकुमार श्रेष्ठं प्राधिकरण, उपभोक्ता समिति लगायतलिसे सहकार्य व समन्वय यानाः सम्पदाया मौलिकतायात विशेष ध्यान बियाः देगः, ताँ व क्यब दयेकेगु प्रतिबद्धता प्वंकादिल ।

लापिपुखुली तुं लुया मवल
थौंकन्हय् लानिपुखुली लः थाकेगु निंतिं नं उपभोक्ता समितिपाखें ज्या जुयाच्वंगु दु । अन हाकुगु चाया पुखूचा दयेकाः लः तया स्वःबलय् उगु लः गनं ज्वया मवंगु खः । आः लानिपुखुली थ्वहे विधि कथं लः तयेगु कुतः जुइ धाःगु दु । तर थ्वया दथुइ लानिपुखुली न्हय्गः तुं दु धकाः न्हापा धाइगु खःसां आः माला स्वःबलय् धाःसा अज्याःगु तुं लुया मवःगु खँ धाःगु दु ।

बरु थीथी थासय् करिब १००-१०० मिटर ड्रिल याना स्वःबलय् गनं लः वःगु व गनं लः मवःगु खँ सीदुगु दु । लानिपुखूया दरवार स्कूल लागाय् लः पिहां वःसां घन्टाघर लागाय् धाःसा ड्रिल याःसां लः पिहां मवःगु खँ धाःगु दु । अथे हे अन थीथी गाः थासय् गाः म्हुयाः लः मुं लाकि ममुं स्वयेगु ज्या नं जुयाच्वंगु दु ।