ने. सं. ११४४ ञलाथ्व नवमी -

‘२ करोड’ या टेपं हल तहल्का

येँ (नेपालाषा टाइम्स)- राष्ट्रिय स्वतन्त्र पार्टीया सांसद ढाकाकुमार श्रेष्ठं मन्त्री जुइत पार्टीइ २ करोड तका बुझे यायेमाः धकाः मेडिकल व्यवसायी दुर्गा प्रसाईंयाके ध्यबा फ्वंगु अडियो सार्वजनिक जुइवं देशय् राजनीतिक तरंग पिहां वःगु दु ।

वय्कलं थः मन्त्री जुइगु धासें मेडिकल व्यवसायी दुर्गा प्रसार्इंयाके २ करोड तका माग याःगु खः । वय्कलं पार्टी सभापति रवि लामिछानेयात उगु ध्यबा बीमाःगु धासें प्रसाईंयाके ध्यबा फ्वंगु खः ।

लिसलय् मेडिकल व्यवसायी प्रसाईं थम्हं निगू करोड तका व्यवस्था याना बीगु तर लिपा थःगु ज्या याना बीमाः धइगु सर्त तःगु खः । लिसें प्रसाईं ध्यबा मिले यायेत छुं ई काइगु जुयाः छुं ई फ्वनेत नं धाःगु खः ।

थ्व टेप वंगु पुस महिनापाखे जूगु संवादया खः । उगु इलय् केपी ओलीया नेतृत्वय् सरकार गठन जुइत्यंगु खःसा उकी रास्वपा नं वनीगु खँ जुयाच्वंगु खः । उकी स्वास्थ्य मन्त्री जुइगु लागिं डा. ढाकाकुमारं नं दावी याःगु खःसा मन्त्री जुइगु खःसा २ करोड माः धकाः पार्टीं माग यायेवं उगु २ करोड ध्यबाया व्यवस्था याना बी माल धकाः डा. श्रेष्ठं दुर्गा प्रसाईंयात इनाप याःगु खःसा अबलय्या उगु संवादया टेप हे आः वयाः सार्वजनिक जूगु खः ।

टेप सार्वजनिक जुइवं रास्वपां सांसद श्रेष्ठयात कारबाही याःगु दु । पार्टीं सांसद व पार्टीया पदय् च्वनाः गुगुं नं कथंया आपराधिक ज्या याये मदइ कथं कारबाही याःगु खः । पार्टीया पदाधिकारीया बैठकं श्रेष्ठयात साधारण दुजः तकं मदइ कथं कारबाही यानागु खँ प्रवक्ता मुकुल ढकालं जानकारी बियादीगु दु ।

उकथं हे सांसद श्रेष्ठया विषयय् छानविन यायेगु अधिकार अनुशासन समितियात बिउगु दु । समितिं न्हय्न्हुया दुने प्रतिवेदन बीगु व वयां लिपा थप कारबाही न्ह्याकेगु खँ नं प्रवक्ता ढकालं कनादीगु दु । थ्वहे झ्वलय् सांसद श्रेष्ठं नं थम्हं प्रसाईंयाके ध्यबा मफ्वनागु खँ धयादीगु दु । वय्कलं प्रसाईंयात थम्हं म्हमसिउ धासें छगू निगू करोड ध्यबाया व्यवस्थापन थम्हं हे यायेफुगु दावी नं यानादीगु दु । वय्कलं अडियोय् सार्वजनिक जूगु सः थःगु मखु धकाः नं धयादीगु दु ।

७२ घौ दुने कारवाही याये – रवि
दुर्गा प्रसाईंलिसे उगु संवाद याःम्ह डा. ढाकाकुमार श्रेष्ठया बारे न्हयन्हुया दुने छानबिन यानाः रिपोर्ट दयेकेगु धकाः रास्वपां धाःसां नं रास्वपाया अध्यक्ष रवि लामिछानें धाःसा ७२ घौया दुने थुकिया छानबिन यानाः सत्य तथ्य खँ पित हयेगु जुइ धयादीगु दु । म्हिगः छगू चुनावी सभाय् न्ववासें वय्कलं यदि ७२ घौया दुने थुकिया सत्य तथ्य खँ पित हये मफुत धाःसा थःत गढीमाईयाथाय् तयाः बलि बिउसां जिउ धकाः नं धयादीगु दु ।

वैशाखं जुइगु उपचुनावया लागिं कडा प्रचार प्रसार जुयाच्वंगु इलय् लाक्क पिहां वःगु थ्व टेप काण्डं यानाः रास्वपायात चुनावय् तकं लिच्वः लाके फइगु अनुमान जुयाच्वंगु दु ।