वइगु आर्थिक दँय् ७५४ मेगावाट मत थप जुइगु

येँ – वइगु आर्थिक दँ २०७५÷७६ य् देशय् निर्माण जुयाच्वंगु मुक्कं झिंच्यागू आयोजना क्वचायाः केन्द्रीय प्रणालीइ ७५४ मेगावाट मत थप जुइगु जूगु दु । चालु आर्थिक दँय् हे क्वचायेकेगु आज्जु तयातःगु आयोजना थुगु दँय् क्वचाइगु जूगुलिं वइगु दँय् मत उत्पादन अप्वइगु जूगु खः ।

नेपाल विद्युत प्राधिकरणं तयार याःगु न्हूगु प्रक्षेपन कथं वइगु दँय् सार्वजनिक निजी साझेदारीइ ४५६ मेगावाटया माथिल्लो तामाकोशी व १४।८ मेगावाटया माथिल्लो सान्जेन आयोजनाया ज्या क्वचाइगु जूगु दु । मेगु ल्यं दनिगु २८५ मेगावाट क्षमताया निजी लगानीं दयेकाच्वंगु क्वचाइगु खँ नेपाल विद्युत प्राधिकरणं धाःगु दु ।

आः आज्जु तयातःगु फुक्कं आयोजना क्वचाल धाःसा केन्द्रीय प्रसारण लाइनय् २ हजार मेगावाट थ्यनीगु खँ धाःगु दु । चालु आवय् २५० मेगावाट मत उत्पादन यायेगु आज्जु तयातःगु खःसा सार्वजनिक व निजी क्षेत्रपाखें १०० मेगावाट जक मत उत्पादन जूगु दु । थुकी मध्ये निजी आयोजनापाखें ७० मेगावाट व विद्युत प्राधिकरणया लगानीइ चमेलिया ३० मेगावाट मत उत्पादन जूगु खः ।

थ्व स्वयां न्हापा छगू दर्जन स्वयां अप्वः आयोजना क्वचायाः ६६१ मेगावाट मत उत्पादन जुइगु अनुमान याःगु खः । चालु आर्थिक दँय् छुं आयोजना दयेकेगु ज्या लिबाःगुलिं यानाः लक्ष्य कथं मत उत्पादन यायेमफुगु खः ।प्राधिकरणया कथं ताः ई लिपा केन्द्रीय प्रसारण लाइनय् माग स्वयां १०० मेगावाट मत अप्वःगु दु ।

थौंकन्हय् मतया माग १२०० मेगावाट दुसा आपूर्ति धाःसा १३०० मेगावाट जुयाच्वंगु दु । थुकिं भारतं ५०० मेगावाट मत आयात जुयाच्वंगु दुसा आन्तरिक उत्पादन ८०० मेगावाट जुयाच्वंगु दु । नेपाः आः मतय् आत्मनिर्भर जुया वनीगु लँपुइ थ्यनाच्वंगुलिं याकनं हे भारतं जुयाच्वंगु आयात म्हो यायेगु योजना नं प्राधिकरणं दयेकाच्वंगु दु ।