ने. सं. ११४४ ञलागा पारू -

नीरो बासुरी पुयाच्वन

रोम च्यानाच्वन, नीरो बासुरी पुयाच्वन । थ्व तसकं बाय्बय् जुयाच्वंगु उखान खः । छगू इलय् रोमया जुजु थःगु देय् रोम च्यानाच्वंगु इलय् कौशी च्वनाः मज्जां बासुरी पुयाच्वंगु घटनायात सलंसः दँ लिपा नं चर्चाया विषय जूगु खः । थौं नेपालय् नं उकथं नेपाली नीरों बासुरी पुयाच्वंगु अवस्था दु। भारतं नेपाःया ७० गू थासय् ६० हजार स्वयां अप्वः हेक्टर जग्गा त्यलाच्वंगु दु। लिम्पियाधुरा, लिपुलेक व कालापानी लागाय् भारतीय सेनां अतिक्रमण यानाच्वंगु दु। थःपिनि न्हूगु नक्साय् नेपाःया उगु भूमि भारतया खः धकाः दावी यानाच्वंगु दु। अथे खःसां झी प्रधानमन्त्री केपी शर्मा ओली धाःसा छगू विश्वविद्यालयया ज्याझ्वलय् बासुरी पुयाच्वंगु किपा वंगु वालय् छगू राष्ट्रिय न्हिपौया मू पृष्ठया मू थासय् तःपाक पिदंगु दु। उकिं नं थ्व इलय् रोम च्यानाच्वन, नीरो बासुरी पुयाच्वन धइगु उखान लुमंके मालाच्वंगु दु ।

नेपाःयात छल यानाः नुना छ्वयेगु ताः तयाः थन सेना छ्वया हयेगु उद्देश्य सहित अमेरिकी सहयोग नियोग मिलिनियम च्यालेन्ज कर्पोरेशन दुत हयेगु कुतः जुयाच्वंगु दु। थ्व देय्यात धराशाही याइगु छगू अस्त्र सावित जुयाच्वंगु दु। झी प्रधानमन्त्री केपी ओली धाःसा थःम्हेसियां बासुरी पुयाः माधव नेपाल व झलनाथ खनाल थेंज्याःपिं पुलांपिं निम्ह
प्रधानमन्त्रीयात सारांगी कीकाः लय्तायाच्वंगु अवस्था दु। उकिं नं धाये मायेका बिउगु दु कि रोम च्यानाच्वन, नीरो बासुरी पुयाच्वन । आखिर लिपा सीदत कि रोम च्याकेत वा देश ध्वस्त यायेत दुनं दुनं नीरो थःम्हेस्यां षडयन्त्रपूर्ण भूमिका म्हितूम्ह जुजु जकं जुयाच्वन । आः नेपालय् नं तःतःधंपिं नेतातय्त अमेरिकी साम्राज्यवादं ख्यानाः, न्यानाः वा ह्ययेकाः हे जूसां थःपिनि पक्ष यंके धुंकूगु अवस्थाय् पार्टी दुनेया अधिकांश नेतातय्सं एमसीसी राष्ट्रघाती जुइफु धाःसां छुं प्रमुख नेतातय्सं धाःसा संसदं उकियात पारित याकाः थन अमेरिकी सेनां परेड म्हितेगु ह्वताः चूलाकेत स्वयाच्वंगु दु। वास्तवय् नेपाःयात थीथी शर्ट सहितया उगु सहयोग आवश्यक मदु । देय्यात परदेश यायेगु दुग्यंगु छगू पलाः जुइफु एमसीसी सम्झौता । न्हापा न्हापा मेमेगु देसय् नं थुकथंया अमेरिकी सहयोग बिउगु दु। तर नेपालय् न्ह्यब्वःगु सहयोग व स्वयां पाः । श्रीलंकाय् नं अमेरिकी सहयोग थुकथं न्ह्यानाच्वंगु दु। तर अनया शर्ट व सुविधा पाः । नेपालय् फुक्कं योजना थःपिनि मातहतय् चले यायेगु कथं व नेपालं नं १३ करोड दां उकि तयेमाःगु कथं ज्या यानाच्वंगु दु। थ्व शर्ट धइगु नेपाःयात ध्वस्त यायेगु छगू जाः खः धाःसां छुं पाइमखु ।

नेपालय् राजनीतिक संकट हयाः थ्व देशयात असफल राष्ट्र घोषणा यायेगु षडयन्त्र कथं अमेरिकां थ्व प्रस्ताब न्ह्यःने हयाच्वंगु खनेदु। तर थ्व मामलाय् प्रतिपक्षी दलया नेता शेरबहादुर देउवां थः प्रधानमन्त्री जुयाच्वनागु इलय् सम्झौता यानागु धकाः झन् गुकू न्ह्यःने वनाः समर्थन यानाच्वंगु दु। सरकारं गल्ती व कमी कमजोरी यायेत्यंगु इलय् प्रमुख प्रतिपक्षी दलं खबरदारीया भूमिका म्हिताः फुसा उगु सरकारयात क्वथलेगु स्वयेमाःगु खः । तर थ्व इलय् नेपाली कांग्रेस व कम्युनिष्ट धाःपिं नक्कली कम्युनिष्टतय्सं छगु हे सः थ्वयेका सदनयात विदेशीया इसाराय् चले यायेगु कुतः यानाच्वंगु दु। थःपिनि मनू सदनय् अप्वः त्यागु व बहुमत दुगुया आधारय् राष्ट्रघाती निर्णय यायेगु सुयातं अधिकार दइमखु। सदनय् चर्को बिरोधया बाबजुत नं थुकियात पारित यायेत स्वयाच्वंगु दु। बागमती प्रदेशय् नं छुं प्रदेश सांसदतय्सं बाहेकं प्रमुख प्रतिपक्षी दल नेपाली
कांग्रेस व नेकपाया सांसदतय्सं चुइक्क नं सः थ्वयेकूगु मदुनि ।

थन नुगः तफाला जूपिं नेतातय् जन्म मजूनि । देश व जनताया सेवा यायेगु भावना दुपिनि जन्म हे मजूनि । उकिं नं धाये मालाच्वंगु दु कि रोम च्यनाच्वंगु दु, नीरो बासुरी पुयाच्वंगु दु ।

भारतय् नागरिकता प्रकरणया कारणं देय् च्यानाच्वंगु दु। मोदी फाँसीवाद व अमेरिकी साम्राज्यवादया प्रभावं नेपाः च्यानाच्वंगु दु। थ्वहे इलय् झी नेतात धाःसा आः देय् गन वनी धइगु चिउता कायेगुया पलेसा बासुरी पुयाः न्हिलाच्वंगु दु। सारंगी कियाः मनोरञ्जन यानाच्वंगु दु। थ्व ई संकटया ई खः । नेतात लय् ताइगु व देश दुबे जुइगु थज्यागु इलय् हे खः । सिक्कीम भारतं काःगु इलय् नं चोख्यालयात तसकं हे लसता पिज्वःगु खः । अले लेण्डूप डोर्जें नं थःगु सफलता कायम जूगु भाःपिउगु खः । लिपा खिचा सित ला ध्वँचा सित ला याना सिना वनेमाल । झी नेतातय्सं नं अज्याःगु नियति भोगे याये माली मखु धाये फइमखु। भारतं थ्व देय् छल्कु यानाः नइगु इलय् आः भारतया छगू प्रान्तया मूख्य मन्त्री सरह हे जक थनया प्रधानमन्त्री व भूपू प्रधानमन्त्रीतय् अवस्था जुइफइगु नं खनेदु।

चीनय् नोबल कोरोना भाइरसया कारणं प्राकृतिक संकट दु। भारतय् नागरिकता प्रकरणया कारणं राजनीतिक संकट दु। नेपालय् धाःसा मोदी फाँसीवाद व अमेरिकी साम्राज्यवादया एमसीसी प्रकरणया कारणं झन् जक संकट ब्वलनाच्वंगु अवस्था दु। थज्याःगु इलय् प्रतिपक्षी व सत्तापक्षी छथाय् च्वनाः उकिया सामना याये फयेकेमाःगु खः । तर ब्यक्तिगत स्वार्थ, थःपिनि दलयात बहुमतया लोभ अले छुं काये दइगु आशां देश मिया शेष नयेगु काइदा जक झी नेतातय्सं स्वयाच्वंगु अवस्था दु। उकिं नं नेपालय्थ प संकटकाल लागू जुयाच्वंगु खनेदु। थःपिनि थासय् थःपिसं हे थप संकट हयेत स्वयाच्वंपिं मेपिं मखु, झी थः नेतात हे खः । नेतातय्गु राजनीतिक चेतना अभिबृद्धि जुइ मफुगु कारणं नेपालय् परिवर्तन वल व प्रजातन्त्र वल धाःसां तबि नं थन वास्तवय् आमूल परिवर्तनया आभास खने मदुनि । थन छुं नं कथंया सांस्कृतिक परिवर्तन वःगु नं मदुनि । स्तर परिवर्तन जूगु नं मदुनि ।

छगु ल्याखं झी नेतात कमजोर व अवास्तविक नेतात हे तिनि धइगु नं क्यं । प्रजातन्त्र क्यनेगु वा जक जुयाच्वंगु दु। तानाशाही नेतात जन्म जुयाच्वंगु अवस्था दु। छम्ह जुजुया थासय् निम्हं स्वम्हं जुजुपिसं थन श्रीपेच विना जुजुया भूमिका म्हिताच्वंगु अवस्था दु। थथे स्वयेगु इलय् झी प्रगतिपाखे न्ह्यःने वनाच्वनागु मखु कि दुर्गतिपाखें न्ह्यचिला च्वनागु थें जक जुयाच्वंगु दु। अझ थन नुगः तफाला जूपिं नेतातय् जन्म मजूनि । देश व जनताया सेवा यायेगु भावना दुपिनि जन्म हे मजूनि । उकिं नं धाये मालाच्वंगु दु कि रोम च्यनाच्वंगु दु, नीरो बासुरी पुयाच्वंगु दु ।