वज्रयान महाविहारयात येँ मनपाया प्यंगू करोड २९ लाख

येँ – येँ महानगरपालिकाया मेयर विद्या सुन्दर शाक्यं ध्यबा स्वयाः योजना दयेकेगु मखुकी योजना स्वयां ध्यबा बीगु खँ धयादीगु दु । लुम्बिनीइ दयेकाच्वंगु नेपाल वज्रायान महाविहारया निंतिं प्यंगू करोड २९ लाख १८ हजार तकाया चेक लःल्हायेगु ज्याझ्वलय् न्ववायेगु झ्वलय् मेयर शाक्यं येँ महानगरपालिकां छुं नं योजनाय् ध्यबा बीबलय् योजना पूवनी कथं हे ग्वाहालि यायेगु खँ धयादीगु खः ।

येँ महानगरपालिका क्षेत्र दुनेया विहारत पुनःनिर्माण ज्याय् महानगरपालिका न्ह्याः वनाच्वंगु खँ न्ह्यथँसें वय्कलं लुम्बिनी नेपाःया म्हसीका बीगु कथं दयेकाच्वंगु विहार जूगुलिं वज्रयान विहारयात ग्वाहालि यानागु खँ कनादिल ।

ज्याझ्वलय् न्ववानादिसें वज्रयान विहारया प्रमुख चक्रेश्वर डा. नरेशमान वज्राचार्यं जनताया दान कयाः दयेकाच्वंगु थ्व विहारय् जनताया जक मखु सरकारया स्वामित्व दयेमाः धकाः स्थानीय तहपाखें ग्वाहालि कयागु खँ कनादिल ।

थ्व झ्वलय् वय्कलं विदेशी ग्वाहालि भचा हे मकासे पूवंक हे नेपाःया लगानी, शीप, प्रविधि, सामग्री छ्यलाः दयेकेगु खँ धयादिल । ज्याझ्वलय् लुम्बिनी विकास कोषया उपाध्यक्ष भिक्षु मैत्रय, लुम्बिनी साँस्कृतिक नगरपालिकाया मेयर, सांसद बीना श्रेष्ठपिंसं नं न्ववादीगु खः ।

येँ महानगरपालिकां बिउगु ध्यबा बज्रयान विहारय् कलात्मक झ्याः व खापा दयेकेत खर्च याइगु खँ धाःगु दु ।