राजधानीया विषयय् याकनं संसदय् दुहां वनी ः मुख्यमन्त्री पौडेल

येँ – नेपाल कम्युनिष्ट पार्टी (नेकपा) या प्रदेश नम्बर ३ या संसदीय दलया बैठकय् प्रदेशया राजधानीया विषयय् सहलह जूगु दु । मुख्यमन्त्री निवासय् आइतवाः च्वंगु संसदीय दलया बैठकय् उगु प्रस्ताव बारे सहलह जूगु खः । संसदीय दलया नेता लिसें मुख्यमन्त्री डोरमणि पौडेलं स्थायी राजधानीया विषययात आः प्रदेश संसदय् नं प्राथमिकता बीगु खँ धयादीगु दु ।

वय्कलं थ्व विषयय् सकसिनं चिउता क्यनाच्वंगुलिं याकनं हे प्राथमिकताय् तयेगु खँ धयादीगु दु । वय्कलं धयादिल, ‘फुक्कं सांसदपिं व जनताया बिचाः प्रदेशया राजधाना याकनं क्वःछीमाः धयागु दु, थ्व विषयय् थौंकन्हय् हे संसदय् प्रवेश याकेगु जु्इ ।’

३ नम्बर प्रदेशयात कयाः थीथी कथंया लबिङ जुयाच्वंगु दुसा मुख्यमन्त्री पौडेलं मकवानपुर जिल्लाया हेटौडाय् तयेमाः धयाच्वंगु दु । मेखे मेमेगु जिल्लाया सांसदतय्सं धाःसा हेटौडा प्रदेश राजधानी तयेगु निंतिं पायक मजू धासें उकिया विकल्प मालेमाः धयाच्वंगु दु ।

अप्वः धयाथें सांसदतय्सं प्रदेशया राजधानी स्वनिगलय् तयेमाः धकाः दबाब बियाच्वंगु दु । स्वनिगःया ख्वप वा पन्तिइ प्रदेशया राजधानी तःसा पाय्छि जुइगु व उगु थासय् पूर्वाधार नं दुगुलिं सरकारयात थप भौतिक निर्माण यायेमाःगु आवश्यकता मदु धकाः सांसदतय्सं धायेगु यानाच्वंगु दु ।