प्रधानमन्त्री ओली, नेता देउवापाखें ट्विट यासें पद्मरत्नयात श्रद्धाञ्जली

येँ – प्रधानमन्त्री केपी ओली, पुलांपिं प्रधानमन्त्रीत शेरबहादुर देउवा व बाबुराम भट्टराई नं ट्विट यासें मदुम्ह नेवाः न्ह्यलुवाः व मानवअधिकारवादी नेता पद्मरत्न तुलाधरयात श्रद्धाञ्जली देछाःगु दु ।

प्रधानमन्त्री व नेकपाया अध्यक्ष ओलीं ट्विट यासें भाजु तुलाधरं वाम आन्दोलनय् यानादीगु योगदान न्ह्याब्लें लुमंकेबह जुइ धयादीगु दु ।
प्रधानमन्त्री ओलीं ट्विटय् च्वयादीगु दु, ‘वरिष्ठ वामपन्थी नेता पद्मरत्न तुलाधरया मदुगु खबरं जितः तसकं दुःख ताःगु दु । नेपाःया वाम आन्दोलनय् वय्कलं यानादीगु योगदान न्ह्याबलें लुमंकेबह जू । मदुम्ह तुलाधरप्रति भावपूर्ण श्रद्धाञ्जली अर्पण यासें वय्कःया छेँजःपिंप्रति समवेदना प्वंकाच्वना ।’

अथेहे पुलाम्हं प्रधानमन्त्री व नेपाली कांग्रेसया सभापति शेरबहादुर देउवां ट्विटय् धयातःगु दु, ‘मानवअधिकारवादी नेता पद्मरत्न तुलाधर मदुगु खबरं दुःखी जूगु दु । नेपाःया मानव अधिकार व भाषा आन्दोलनय् वय्कःया योगदान स्मरणीय जुइ । वय्कःया आत्माया चिर शान्तिया कामना यासें छेँजःपिंत हार्दिक समवेदना व्यक्त यानाच्वना ।

पुलांम्ह प्रधानमन्त्री व नयाँ शक्ति नेपालया संयोजक भट्टराईनं नेपाःया इतिहासया छम्ह आसाधारण व्यक्तित्व, समावेशी लोकतान्त्रिक ओन्दोलनया अथक योद्धा व जिं दकलय् अप्वः आदर यानापिं मध्ये असल मानव पद्मरत्न तुलाधरया निधनं मर्माहत जूगु दु । वय्कःप्रति श्रद्धा सुमन, शोकसन्तप्त परिवारजनय् हार्दिक श्रद्धाञ्जली धयादीगु दु ।